O bono social eléctrico, un desconto na factura da luz do que se poden beneficiar fogares en situación de vulnerabilidade, poderá seguir solicitándose a partir do 1 de xaneiro, segundo informou o Ministerio para a Transición Ecolóxica.
Os usuarios do antigo bono social que, aínda cumprindo os criterios, non renoven o bono a 31 de decembro, non perden o seu dereito a solicitalo. Unha vez comece 2019, calquera cidadán pode tramitar o bono social en calquera momento e, se cumpre os criterios, poderá beneficiarse das rebaixas do 25% ou 40% na factura estipulados pola normativa.
Segundo os últimos datos dispoñibles, recibíronse máis dun millón e medio de solicitudes completas, das cales máis un millón xa teñen activado o bono social eléctrico. Estes fogares recibirán ademais un bono adicional para sufragar os gastos de calefacción durante o próximo inverno.
Esta medida, unida á ampliación dos criterios de renda para acceder ao bono e a extensión da prórroga para renovar o antigo bono social ata o 31 de decembro, foi introducida polo Goberno o pasado mes de outubro, mediante o Real Decreto Lei 15/2018, de medidas urxentes para a transición enerxética e a protección dos consumidores.
En 2017, a regulación do bono social modificouse para incluír o criterio de renda no seu proceso de concesión. Ata entón, o bono aplicábase aos usuarios con contratos de baixa potencia (3 Kw), o que incluía outras realidades diferentes aos fogares expostos a vulnerabilidade como, por exemplo, pisos baleiros, locais ou vivendas vacacionais.
O Real Decreto Lei 15/2018 tamén flexibilizou a forma na que os usuarios poden dispor dos descontos para, por exemplo, facer fronte aos maiores gastos de luz no inverno. De igual modo, prohibe o corte de subministración nos fogares acollidos ao bono social onde viva polo menos un menor de 16 anos; unha persoa cun nivel de discapacidade do 33% ou superior; ou unha persoa en situación de dependencia en Grao II e III, circunstancias que non estaban contempladas na anterior regulación do bono.
