O vicepresidente da Xunta, Alfonso Rueda, inaugurou este xoves, xunto coa conselleira do Medio Rural, Ángeles Vázquez, a cuadraxésimo primeira edición da Feira Internacional Abanca Semana Verde de Silleda, que este ano reúne a máis de 700 expositores de vinte países distintos.
Esta cita, que estará presente no recinto feiral deste municipio pontevedrés ata o vindeiro domingo, conta cunha importante variedade de expositores cuxo contido varía desde sectores tradicionais neste evento, como a alimentación, a pesca ou o turismo; ata novidades como a artesanía e o mobiliario. Ademais, nesta ocasión exporanse tamén vehículos de ocasión e haberá unha numerosa representación de importantes empresas a nivel galego que colaboran coa Semana Verde e que promocionarán os seus produtos.
Para o acceso ao recinto, a organización dispuxo un servizo de autobús específico e gratuíto desde Santiago de Compostela.
Na súa visita, Alfonso Rueda sinalou que se ve reflectida "a tendencia de mellora" da feira manifestada nos últimos anos e que provocou que esta cita se recuperase logo de atravesar un período duro durante a crise económica.
Así mesmo, tamén destacou a "importante representación" doutras Administracións públicas, concretamente a Xunta de Andalucía e a Deputación Provincial de Burgos.
Pola súa banda, a conselleira de Medio Rural, Ángeles Vázquez, valorou que a Semana Verde triplicara o seu espazo de exposición nos últimos dez anos e puxo de relevo o papel "dinamizador" deste evento para todos os municipios dos arredores.
