Alxeria cumprirá coa subministración de gas natural nos termos xa pactados e está preparado para aumentar os volumes de exportación no caso de que España demande cantidades adicionais, pese ao abandono o vindeiro domingo do envío a través do Gasoduto Magreb-Europa (GME). O compromiso foi apuntado este mércores polo ministro alxerino de Enerxía, Mohamad Arkab, e a vicepresidenta terceira española e ministra para a Transición Ecolóxica e o Reto Demográfico, Teresa Ribera.
En declaracións á prensa tras reunirse en Alxer, Ribeira revelou que o Goberno alxerino ten preparado un plan para compensar calquera descenso ou continxencia a través do transporte marítimo de gas licuado.
"Tranquilizamos aos nosos socios españois e dixémoslles que cumpriremos coa nosa subministración de gas natural nas cantidades pactadas no marco dos contratos celebrados entre Sonatrach e as empresas españolas", afirmou o ministro. "Estamos listos para falar sobre volumes suplementarios co fin de fornecer todas as cantidades adicionais que necesiten", engadiu.
O ministro alxerino de Enerxía e a titular española de Transición Ecolóxica analizaron este mércores o futuro da subministración
A incerteza sobre a subministración de gas alxerino, clave para a industria española e europea, crecera desde que o pasado mes de agosto Alxeria rompese as relacións diplomáticas con Marrocos e anunciase a súa decisión de non utilizar o GME, que nace en Europa e chega a España a través de Marrocos, unha vez que expire o contrato o próximo 31 de outubro.
Días atrás, o presidente alxerino, Abdelemedjid Tebboune, xa advertiu de que a subministración a España só se faría a través do gasoduto Medgaz, que une Alxeria e España sen pasar polo territorio marroquí, pero non aclarou que ocorrería cos contratos do GME.
TRANSPORTE DE GAS LICUADO. Medgaz ten unha capacidade de subministración anual duns 8.000 millóns de pés cúbicos, similar á de GME, e está previsto que a finais de novembro aumente a 10.500, unha diferenza que desatara as inquietudes.
Unha preocupación que Ribera tratou de despexar este mércores ao revelar que existe un plan para compensar calquera continxencia ou elevar as cantidades a través dunha flota de buques para o transporte de gas licuado. "Explicáronnos como acometer este transporte de gas a través do gasoduto de Medgaz vista que a relación contractual co gasoduto do Magreb expira o 31 de outubro e como complementala con gas natural licuado con arranxo a un calendario que temos que precisar do mellor xeito posible para asegurar que todo funciona do modo tamén máis fluído e mellor posible", sinalou.
A subministración de gas alxerino é clave para a industria española e europea
A este respecto, a ministra recalcou que se estudaron "todos os elementos técnicos que permitan maximizar o transporte deste gasoduto e estar en conversas cos comercializadores españois que se encargan precisamente de poder traballar, de poder pedir alén da tubaxe ese gas.
ELECTRICIDADE. Ribera subliñou que, máis aló dos hidrocarburos, discutíronse outros proxectos de cooperación bilateral enerxética noutros sectores, como o da electricidade e as renovables, xa que ambos os países "que teñen desafíos parecidos no ámbito do cambio climático, da enerxía, da auga e que teñen relacións institucionais, diplomáticas e comerciais en ámbitos moi distintos".
"Este non é o único aspecto importante da relación de España e Alxeria en relación coa enerxía. Falamos doutros moitos asuntos, nos que a electricidade, as novas fórmulas de enerxía renovable, o almacenamento ou o hidróxeno, ou no seu caso a construción dun cable eléctrico que permita que a interconexión entre os dous continentes poida chegar a materializarse ao longo dos próximos anos".
