O Consello de Ministros aprobou este martes a subida de 15 euros mensuais do salario mínimo interprofesional (SMI) con efecto desde o 1 de setembro, ata 965 euros brutos en 14 pagas, segundo o acordado polo Goberno e os sindicatos co rexeitamento da patronal.
Na rolda de prensa posterior ao Consello, a vicepresidenta segunda e ministra de Traballo, Yolanda Díaz, enmarcou este incremento do 1,57 % no contexto dunha recuperación xusta.
A subida atópase no rango medio da pinza de entre 12 e 19 euros recomendada pola comisión asesora sobre o SMI, unha alza que os sindicatos consideran insuficiente, pero que aceptaron porque o Goberno se comprometeu a seguir subíndoo en 2022 e 2023 para situalo no 60% do salario medio ao final da lexislatura.
"Pómonos a traballar con carácter inmediato para dar cumprimento á senda que os expertos sinalaron ata 2023", afirmou a vicepresidenta, quen incidiu no compromiso de terminar a lexislatura cumprindo a Carta Social europea, cun SMI equivalente ao 60 % do salario medio nacional, o que equivalería a 1.049 euros, segundo os expertos.
A patronal descolgouse do acordo ao considerar que aínda non é o momento dunha nova subida porque aínda ten que consolidarse a recuperación económica e a do emprego.
Os empresarios eran partidarios de deixar pasar 2021 e falar da subida en 2022, tendo en conta que subira un 22% en 2019 e outro 5,5% en 2020.
No entanto, a vicepresidenta sinalou que "fronte aos agoreiros" as subidas do SMI demostraron a súa eficiencia económica ao reducir dous puntos a brecha salarial de xénero.
Segundo a última enquisa anual de estrutura salarial de 2019, o 11,12% dos afiliados á Seguridade Social cobraban o salario mínimo, isto é, uns 1,8 millóns de persoas.
Con todo, o número de beneficiarios é moi superior tendo en conta que o SMI se utiliza como mínimo de ingresos para acceder a axudas e subsidios, como é o caso do percibido por desempregados maiores de 45 anos con cargas familiares.