O grupo Pontegadea, vehículo investidor do propietario de Zara, Amancio Ortega, comprou por 31 millóns de libras (34,7 millóns de euros) un edificio no centro de Glasgow, segundo informou este martes o diario escocés The Herald. O inmoble, que actualmente ocupan locais comerciais e oficinas, foi adquirido ao fondo Lothbury Investment Management, que o comprou pola súa banda en 2013 por 17,42 millóns de libras (19,51 millóns de euros), segundo o xornal.
O espazo da planta baixa do edificio está actualmente ocupado polas firmas Vodafone, Lush e Starbucks, mentres que nos tres pisos superiores manteñen oficinas diversas compañías, entre elas Building Design Partnerships, BNP Paribas Real Está e Drum Property Group.
O inmoble ten accesos nos números 78-90 da rúa Buchannan Street e no 9-17 da praza Exchange Place de Glasgow. "Buchanan Street foi un dos activos de Lothbury Property Trust que deu mellores resultados desde que o compramos en 2013", declarou a The Herald o director executivo do fondo investidor.
