O fundador e máximo accionista de Inditex, Amancio Ortega, mantense á fronte das grandes fortunas de España (46.000 millóns), a pesar de que o seu patrimonio diminuíu en 1.600 millóns, segundo a lista Forbes, que reflicte que os máis ricos do país elevaron a súa fortuna o 9,2% nun ano.
En total, as cen grandes fortunas de España aglutinan 164.424 millóns, o equivalente ao 15,6% do PIB do país, segundo a revista Forbes, cuxo editor en España, Andrés Rodríguez, subliñou que a súa riqueza real é, sen dúbida, maior, xa que para elaborar a lista non se contabilizan contas correntes ou artigos, como casas ou xoias, compradas a título persoal e non vía sociedades.
Forbes atribúe o descenso da fortuna de Ortega á caída do valor en bolsa das accións de Inditex e o aumento do patrimonio dos máis ricos, xa que en épocas de crises os prezos baixan e quen ten diñeiro dispoñible pode aproveitar as oportunidades de compra.
Na súa segunda edición, a lista Forbes España, reflicte a entrada, entre outros, dos herdeiros de Emilio Botín e Isidoro Álvarez, e de Leopoldo Fernández Pujals, que se estrea no posto 63 tras a venda das súas accións en Jazztel.
No segundo posto sitúase a familia de Rafael del Pino, máximos accionistas de Ferrovial, que, con 6.400 millóns (1.100 millóns máis que en 2013), relega ao presidente de Mercadona, Juan Roig, á terceira posición, cunha fortuna de 6.000 millóns (200 millóns máis).
