Sector estratéxico da economía galega, a biotecnoloxía ten no desenvolvemento de alimentos funcionais un filón a explotar. Neste marco, a pontevedresa Hifas da Terra e o grupo alimentario ourensán Cuevas presentaron este mércores os primeiros resultados do estudo clínico que realizou a Fundación Foltra, especializada en terapias de rehabilitación neurolóxica, para testar a nova sobremesa. Utilizando como base unha crema de castaña, con laranxa para mellorar o seu sabor, os socios engadiron gaba e ergotioneína, dúas moléculas extraídas do cogomelo shiitake que demostraron "efectos positivos a nivel neuronal". Con respecto á última, os estudos ligan a súa diminución en sangue a partir dos 60 á deterioración cognitiva.
O proxecto Neurofood, que arrincou en 2018 e que contou con financiamento da Axencia Galega de Innovación e apoio da Consellería de Economía e da Fundación Empresa Universidade Galega, nace de combinar o potencial de dous referentes nos seus campos. Dun lado, Cuevas, que lidera en España a comercialización de produtos derivados da castaña cunha cota de mercado do 80% ao procesar ao ano 700 toneladas e facturar no estranxeiro o 25% da súa cifra de negocio. Do outro, Hifas da Terra, unha biotech que dispón dunha das maiores micotecas fúnxicas privadas de Europa, que emprega a modo de banco "xenético". A súa misión é procurar aplicacións das súas investigacións á saúde.
Nas diversas fases da investigación tamén participaron a USC e a UVigo, a patronal da conserva Anfaco e o Centro Tecnolóxico da Carne.
No ensaio observáronse "melloras" na atención, a velocidade de procesamento, a concentración e a memoria
Segundo explicou Esteban Sinde, subdirector xeral de I+D+i de Hifas da Terra, o obxectivo do estudo é investigar a posibilidade de que o alimento funcional axude a deter "ou retardar a neurodexeneración".
Así, no ensaio participaron 40 voluntarios sans cunha idade media de 53 anos, dos cales 27 superaron a primeira fase, na que foron sometidos a unha avaliación médica para analizar os seus hábitos alimentarios, existencia de enfermidades e parámetros vitais, cardíacos e de calidade do soño. Xa na fase dúas, os participantes consumiron a sobremesa dúas veces ao día tres días por semana entre o pasado xuño e agosto e, segundo explicaron os doutores Aurora Camacho e Carlos Agra, da Fundación Foltra, observáronse "melloras" na atención, a velocidade de procesamento, a concentración e a memoria.
Polo momento, o estudo segue o seu curso, pois aínda quedan etapas a queimar ata a comercialización de Neurofood. Neste sentido, os portavoces de Foltra apuntaron ao interese de investigar a situación da microbiota ao consumir esta sobremesa, dados os estudos científicos que relacionan o estado da flora intestinal coa aparición de placas amiloides no cerebro, consideradas biomarcadores do Alzhéimer.
Ao consorcio sumouse recentemente a pontevedresa Algamar, pioneira en España na explotación destes organismos mariños desde 1996. A súa achega a Neurofood céntrase en determinar que compostos das algas poden ter capacidade neuroprotectora.
A viguesa Essence Food presentará a próxima semana na feira GulFood de Dubái unha proposta baseada en aplicar a tecnoloxía dixital a novas formas de alimentación funcionais. Apoiada pola aceleradora da Xunta Business Factory Food, a firma pode producir alimentos liofilizados de alto valor nutricional aproveitando excedentes de produción e evitando o desperdicio de comida. Crear unha planta en Galicia
A compañía que dirixe Marcio Barradas (na foto) presentará Moodbytes, filial de Essence Food especializada na impresión 3D de alimentos. A matriz proxecta levantar a súa primeira planta industrial en Galicia.
