Támara Echegoyen, primeira española na Volta ao Mundo de Vela

A campioa olímpica e pentacampeona mundial Támara Echegoyen converterase na primeira española en formar parte dunha tripulación, a bordo do Mapfre na Volvo Ocean Race 2017-2018 -Volta ao Mundo por etapas- que se iniciará en Alacante o próximo 22 de outubro.

A galega debutará na Role Fasnet Race, a travesía da costa sur de Inglaterra que conta con 1.120,5 km, que dará comezo en Cowes (Reino Unido) o próximo 6 de agosto. O xoves partiu co VO65 Mapfre de Sanxenxo (Pontevedra) rumbo a Cowes con toda a tripulación que comanda o campión mundial e olímpico, o tamén español Xabi Fernández.

A ourensá de 33 anos, que foi medalla de ouro na clase Elliott (Match Race) dos JJOO de Londres 2012, dixo sobre o seu debut: "A Rolex Fastnet Race é unha boa proba para saber ata onde podo chegar".

"Para chegar a este momento foron meses duros de traballo pero estou moi contenta co resultado porque grazas á axuda de todos e, sobre todo das horas no barco, puiden mellorar neste mundo que é tan novo para min. Estou moi agradecida sobre todo polo esforzo e o tempo que me dedicaron ata agora para poder mellorar ás alancadas", sinalou sobre o esforzo realizado durante os últimos meses.

A Rolex Fastnet Race será clave para adaptarse á Volta ao Mundo, como sinala ela mesma. "É unha boa proba para saber ata onde podo chegar e cales son as habilidades que necesito mellorar para ser un punto forte dentro do equipo. É un punto de inflexión nesta carreira cara á saída da Volvo e teño que seguir aprendendo".