Un total de sete podios foi o balance logrado polos piragüistas do Club Fluvial de Lugo na disputa da edición número 49 do Descenso Internacional do Miño-Tui, celebrada sábado con saídas de mañá e tarde. Os padeeiros lucenses lograron os primeiros postos en xuvenís k-1 e k-2, así como en cadetes k-1, e foron segundos en c-1 senior e en k-2 de veteranos. Tamén obtiveron medallas de bronce en c-1 cadetes e en k-1 senior feminina.
O Club Fluvial de Lugo comezou da mellor forma posible a competición coa saída da mañá para as embarcacións de k-1 cadetes, na que o conxunto lucense estivo representado por Roi Branco, que se fixo coa vitoria ao rexistrar unha marca de 1:11.50 para cubrir o percorrido de 14 quilómetros. Tamén destacaron nesta mesma categoría, pero na modalidade de c-1, Alejandro Zas e Pablo Fernández, terceiro e cuarto respectivamente.
Na categoría de veteranos, Adrián Jubón conseguiu un destacado cuarto posto, pouco antes de que o k-2 de Bernardo Sánchez e Francisco Vázquez lograse a medalla de prata. Os lucenses entraron por detrás dos padeeiros do Club Ría de Betanzos, que marcaron un tempo de 1:02.345, mentres que os representantes do Fluvial cruzaron a meta cunha marca de 1:03.164.
Pola tarde, as medallas continuaron chegando para os padeeiros lucenses. En categoría xuvenil, Jorge Massagues levou a vitoria con autoridade en k-1, mentres que os seus compañeiros Samuel Quiroga e Adrián Neira fixeron o propio en k-2 ao cruzar primeiros a liña de meta cun rexistro de 1:05.31, con máis de catro minutos sobre os segundos.
Despois chegoulles a quenda aos padeeiros senior de c-1, unha categoría na que o Fluvial de novo alzouse cunha medalla, grazas ao segundo posto de Luís Yasser. Tamén en categoría feminina o Fluvial de Lugo logrou estar no podio grazas á gran actuación de Nora Rei, terceira en k-1 1.400 metros cunha marca de 1:24.469.
