jueves. 02.04.2020 |
El tiempo
jueves. 02.04.2020
El tiempo

72-66. Picada do Breogán en Oviedo

O Breogán caeu en Pumarín. ÁREA 11
O Breogán caeu en Pumarín. ÁREA 11

O Breogán perdeu na prórroga en Oviedo logo de chegar ao último cuarto once puntos abaixo

O Leite Río Breogán sufriu unha inesperada derrota na súa visita á cancha do antepenúltimo clasificado do grupo, un Liberbank Oviedo Baloncesto que lle xerou moitos problemas ao ataque lucense e que, a pesar dos esforzos do equipo de Diego Epifanio, foi sempre por diante no marcador. Conseguía Breogán forzar a prórroga no último suspiro, pero os ovetenses volvían afogar o ataque visitante ys e facían co triunfo.

Os lucenses atopáronse de entrada cun férreo sistema defensivo que anulou moitos dos seus efectivos. Tiñan moitos problemas para anotar os breoganistas, e só Pena conseguía romper a defensa local (5-5, minuto 2).

A defensa do Breogán funcionaba e Oviedo tampouco anotaba con comodidade, aínda que conseguía chegar con maior frecuencia á pintura que o seu rival. Aos poucos, con todo, Breogán conseguía sacudirse a presión, Nurguer e Quintela empezaban a entrar en xogo e o choque tornábase máis aberto (13-13, minuto 6).

A igualdade mantívose ata minuto 7, pero un triplo de Llorente e unha canastra de Arteaga tras unha perda de balón dos lucenses colocaban a Liberbank Oviedo Baloncesto con cinco puntos de vantaxe a dous minutos do final do primeiro cuarto (20-15). Paraba o partido o técnico breoganista en busca de solucións e conseguía frear a escapada local, aínda que non reducir diferenzas (23-17).

Intentou manter esa intensidade defensiva Leite Río Breogán no inicio do segundo cuarto, e aínda que seguía tendo problemas en ataque, conseguía evitar que o seu rival anotase con facilidade. A pesar de todo, Arteaga aumentaba a renda local (25-17), aínda que un triplo de Ahonen puña fin á seca inicial dos lucenses (25-20, minuto 12).

O traballo defensivo dos bregoanistas parecía que por fin empezaba a dar froitos e os lucenses conseguían secar o ataque dos locais e dous tiros libres convertidos por Gavrilovic reducen distancias (25-22, minuto 13). Pero o certo é que as canastras chegaban con conta pingas e ao ecuador deste segundo cuarto chegábase cun curto parcial de 2-5.

Tras o descanso o encontro volvía a trabarse e Breogán sufría de novo a intensidade defensiva do cadro asturiano, que se ía con sete puntos de renda (41-34, minuto 22). Dous tiros libres de Salva Arco daban aire aos lucenses, que cun triplo e unha canastra de Quintela metíanse de cheo no partido (45-41, minuto 25).

Duraba pouco a alegría. Breogán era incapaz de manter o ritmo durante moitos minutos e volvía atascarse por completo. Ata cinco minutos estaban sen anotar de novo os galegos, que vían como nese tempo o seu rival, pasito a pasito, volvía tomar distancia no luminoso. De pouco servían os tempos mortos e os cambios realizados por Diego Epifanio e Oviedo íase de 12 puntos (53-41). Só un tiro libre convertido por Nogués a 15 segundos do final movía o marcador dos galegos, que se ían ao cuarto final con 11 puntos de desvantaxe (53-42).

A diferenza era alcanzable e o Leche Río Breogán entendeuno á perfección. O equipo de Diego Epifanio mostrou a súa mellor cara no inicio do último cuarto e da man de Gavrilovic, con 6 puntos, Olah e Quintela, os galegos empataban o partido (53-53, minuto 33). Replicaba Oviedo cun triplo de Sanz e a partir de aí as defensas volvían imporse e o marcador estaba mais de dous minutos sen moverse. Tras esa seca golpeaba de novo o cadro asturiano, pero Breogán non baixaba os brazos e Gavrilovic conseguía empatar o partido a falta de dous segundos para o final, forzando a prórroga (61-61).

A pesar dos esforzos dos de Epifanio, o Oviedo acabaría por imporse na prórroga asinando un 72-66.

72-66. Picada do Breogán en Oviedo
Comentarios