A liga Endesa volve ao Pazo. Logo de dúas tempadas, o Río Breogán retorna á considerada, logo da Euroliga, como
Será, polo tanto, unha reestrea para o Río Breogán extremadamente esixente. Un equipo, o lucense, aínda con algunhas dúbidas por despexar e, sobre todo, con moito traballo de adaptación por facer. Non se pode obviar que oito xogadores actuarán este sábado no seu primeiro partido na ACB no equipo breoganista e que, ademais, as súas seis incorporacións chegaron de competicións distintas. Non será fácil nin rápido o coñecemento e a toma de contacto cunha competición tan esixente.
Esta, ademais da indubidable calidade do seu persoal, será unha das grandes vantaxes do Lenovo Tenerife no encontro desta tarde. Os canarios manteñen o bloque que tan bo resultado obtivo a pasada tempada e os catro novos xogadores coñecen perfectamente a competición española, como é o caso de Sean Smith —chega do Palencia—, de Tobias Borg —xogou a pasada tempada no Betis—, de Joan Sastre —que o fixo na Valencia— e Kyler Wiltjer —que aínda que procede do Telekon Ankara turco ten pasado no Unicaja—.
Con todo, nada disto —nin a calidade do rival nin a súa superior adaptación— debe de servir de escusa. O Río Breogán debe ser consciente de que alcanzar o obxectivo, é dicir, manter a categoría, vai estar moi caro esta tempada. Cada partido pode ser determinante e, polo tanto, hai que afrontalo deste xeito independente do rival. E máis nos partidos que se disputen a favor de ambiente.
Tampouco pode haber dúbidas —isto non só será cuestión de esforzo e implicación—. Os homes de Paco Olmos necesitan mellorar aspectos determinantes do xogo que quedaron ao descuberto nos partidos de preparación. Empezando polo traballo defensivo.
O equipo lucense preséntase ante os seus afeccionados con novo técnico, Paco Olmos, e oito debutantes na liga ACB
O equipo lucense traballou nos ensaios unha defensa moi presionante en primeira liña pero que non tiña continuidade. É dicir, os rivais, unha vez superada a presión inicial, non tiveron impedimentos para conseguir tiros liberados e, polo tanto, romper unha e outra vez o dispositivo defensivo cunha sangría de triplos. O Obradoiro endosou aos breoganistas 19 canastras de tres puntos, o Joventut 13 e a Valencia 11. Ademais, os desaxustes defensivos provocaron, en non poucas ocasións, problemas no rebote defensivo cos xogadores máis grandes fóra da súa área de influencia, é dicir, moi afastados do aro.
Ante un equipo coa capacidade do Tenerife, repetir estas carencias sería perigoso. O conxunto canario superou a pasada campaña o 40% de acerto nos lanzamentos triplos —concretamente alcanzou un 41,4% que só foi superado polo FC Barcelona cun 43,1%—, o que indica que é unha das súas principais bazas sabendo sacar moitas vantaxes desde o pick and roll.
En ataque, os de Paco Olmos buscarán na rapidez a fórmula para espremer as características de xogadores como Bell-Haynes ou Musa. Ambos serán determinantes na sorte do equipo, e buscarán atacar en superioridade para mitigar a escasa ameaza que no xogo estático mostrou ata agora o conxunto breoganista.
A velocidade será clave no ataque breoganista
É todo un reto para os homes de Olmos. Nunha competición como a liga Endesa, onde o triplo adquiriu unha crecente importancia, o Breogán preséntase coa dobre deficiencia neste apartado: problemas para impedir lanzamentos cómodos do rival e trabas para anotar cunha aceptable porcentaxe desde esa distancia.
TENERIFE. Nun magnífico persoal como a canaria destacan dúas referencias sobre todo. Marcelinho Huertas, que por problemas nun xeonllo é dúbida para o encontro deste sábado, e o pivote Gio Shermadini, o MVP da liga Endesa a pasada tempada. De todos os xeitos, Bruno Fitipaldo é na posición de base toda unha garantía para manter o habitual bo nivel de Hortas. Todo isto sen desmerecer ao resto do equipo, todos cun rol moi ben definido e que interpretan á perfección.
Un bo exemplo é o exbreoganista Emir Sulejmanovic —que este sábado alcanzará e precisamente no Pazo a centena de partidos na ACB—, un bo complemento no xogo interior potenciado coa chegada de Kyle Wiltjer e a presenza de Fran Guerra.
Desde o exterior, Aaron Doornekamp, Sasu Salin e o recentemente chegado Joan Sastre son unha ameaza constante para a defensa rival. Nas cinco ocasións que o Tenerife xogou, en ACB, en Lugo só gañou na súa última visita, en 2019, (84-85).
