Viveiro e Sarriana miran ao alto

A TERCEIRA XORNADA da liga de Autonómica Preferente deixa a un Viveiro que se mantén intratable como líder na categoría e tamén á Sarriana, que asoma na zona alta da clasificación tras gañar ao Sofán. O Foz, pola súa banda, arrincou un meritorio empate ante o Arteixo e o Residencia non puido superar a un poderoso e contundente Noia.

Cantarrana acollía o derbi lucense da xornada, un duelo que tiña moitos atractivos. Xa no terreo do xogo, o conxunto mariñán encargouse de evidenciar o seu bo momento de forma cunha gran primeira metade que lle serviu para irse ao descanso cunha vantaxe de tres goles. O Lemos, enfronte, non tivo resposta para conter a un Viveiro que aparece en todas as quinielas como gran candidato ao ascenso.

Outro conxunto que mira cara arriba é a Sarriana, que foi capaz de imporse pola mínima no campo do Sofán e asómase con 7 puntos na parte nobre. A solidez defensiva e o acerto nunha acción de ataque na segunda metade permitiu ao conxunto sarrián sumar os tres puntos.

Tamén foi de mérito o punto arrincado polo Foz na súa visita ao campo do Atlético Arteixo. Os focenses viñan con moral logo dos últimos resultados e competiron ben ante un bo rival.

Mentres, no campo da Cheda o Residencia perdeu de forma clara por 1-4 ante o Noia. Os lucenses estiveron ben nunha primeira metade que foi bastante igualada e así se chegou ao descanso con empate a un tanto. Desgraciadamente, a segunda parte foi realmente mala para os intereses do Residencia, que se atopou cun ciclón en ataque por parte do Noia e aí chegaron tres tantos que sentenciaron e deixan aos visitantes con mellores sensacións tras o seu anterior tropezo.

Non tivo sorte o Ribadeo que perdeu por 1-3 ante o San Tirso nun choque que supuña para os mariñáns a súa estrea como locais, aínda que neste caso no campo das Valgas. Logo dunha primeira parte sen tantos, o Ribadeo viuse superado na segunda metade e un 0-3 realmente contundente que supuxo maquillouse co gol de Martín.

Colaboraron nesta información a Axencia Deportiva Galega e José Ángel Díaz.