O Durán Maquinaria Ensino visita esta tarde, desde as 19.15 horas, ao Valencia nun encontro correspondente á segunda xornada da liga Día feminina. O conxunto lucense, logo da derrota na xornada inaugural ante o Cadí La Seu, ten agora unha proba realmente esixente porque o espera un dos equipos chamados a estar por detrás dos dous grandes favoritos, o Spar Xirona e as Perfumerías Avenida.
O equipo que adestra Juan Nécega chega o choque coa única baixa confirmada de Kalis Loyd, á que aínda lle restan aproximadamente dúas semanas para estar dispoñible para axudar o equipo. Durante a semana houbo dúas xogadoras, Richards e Breedlove, que non puideron adestrar ao cen por cento, pero ambas van xogar ante o Valencia.
O equipo ofreceu unha boa imaxe no primeiro partido da tempada, pero faltou algo para poder levar a vitoria e aí é onde insistiu o adestrador, na melloría do equipo e manter a intensidade para ter opcións de pelexarlle a vitoria a un conxunto valenciano que está en crecemento e que apunta a que será realmente difícil sorprendelo, e máis como local.
Hai que recordar que os dous conxuntos subiron xuntos á máxima categoría do baloncesto nacional hai dúas campañas, logo dunha fase de ascenso que viviu o seu momento clave precisamente en Valencia. Agora, o Ensino busca dar un paso máis, coa permanencia como primeiro obxectivo, pero sen renunciar a coarse na zona media e ver de cerca a Copa Princesa e as eliminatorias polo título.
Enfronte espérao unha Valencia que está chamado a conseguir grandes cousas. No seu segundo ano na liga feminina, as valencianas formaron un equipo completo e máis compensado que o ano pasado. Incorporaron xogadoras con experiencia e nacionais que se atopaban fóra das nosas fronteiras, como Queralt Casas e Leticia Romero, ademais de xogadoras internacionais de nivel como a MVP do ano pasado, Julia Resingerova, ou a belga Jana Raman. Outra boa noticia é que terán desde o principio á base Marina Lizarazu, que se perdeu a tempada pasada por lesión. Campaña chea de ilusión para o club coa súa primeira competición europea, a EuroCup.
Así é a presentación dun equipo que supón toda unha proba de lume para un Ensino que acode sen complexos e con ganas de dar guerra.
