A LEB Ouro regresará este sábado ao Pazo dos Deportes cun duelo (19.00 horas) entre o Leite Río Breogán e un Oviedo que está chamado, como o equipo lucense, a ser un dos protagonistas da tempada. Para empezar, e para que sirva de aviso, o equipo asturiano superou na primeira xornada ao Palma, que parte xunto ao Breogán na primeira liña de saída entre os candidatos ao ascenso de categoría.
Serán moitas as caras coñecidas que este sábado visitarán o Pazo coas cores do equipo oventense. Para empezar, o seu adestrador, Javi Rodríguez, que foi o base do equipo lucense nas tempadas 2002-03, e de 2004 a 2006.
O técnico do Porriño conta cun persoal con catro xogadores con pasado en Lugo. Sergio Llorente, Álex Reyes, Devin Wright e Oliver Arteaga. E os catro están chamados a ser pezas importantes. Llorente chegou mediada a pasada campaña e rendeu a un gran nivel, o que lle valeu a súa continuidade. Álex Reyes (formado no Estudiantes) é un xogador chamado a dar un salto de calidade e ser capaz de liderar ao seu equipo.
Oliver Arteaga, todo un veterano, intentará impor a súa lei na zona, onde contará coa axuda dun Dedvin Wright que é todo corazón e loita.
Xunto a eles, destaca a presenza do á-pivote Rolandas Jakstas, un xogador rochoso que se fai notar nas zonas, e de Víctor Pérez, que sempre é unha ameaza desde a liña de tres puntos.
Preséntase un partido complicado e Diego Epifanio, adestrador do Breogán, sábeo. "O Oviedo é un equipo tácticamente moi rico, un persoal moi polivalente, con xogadores que poden facer moitas cousas. Creo que está moi ben traballado e ten moitos focos de perigo e xa demostrou na primeira xornada que é un conxunto que non só conta con bos xogadores, senón que demostraron que sabían o que tiñan que facer para gañar ao Palma", sinalou.
"Para estas alturas de competición ten unha complexidade táctica bastante elevada", engadiu o adestrador do Breogán.
Epifanio referiuse ao partido entre o Oviedo e o Palma. "Gañar fóra da casa na LEB é moi complicado. O Oviedo, cambiando os bloqueos directos, conseguiu frear a achega ofensiva do Palma, baixoulles o ritmo, e esa foi unha das claves do encontro. Ademais, está claro, do acerto que tiveron os xogadores do equipo asturiano", sinalou.
Epifanio referiuse á estrea do seu equpo no Pazo. "Vexo ao equipo con moitas ganas de xogar o noso primeiro partido como locais. Hai algúns xogadores coas típicas molestias, pero espero que estean os doce dispoñibles", apuntou.
O técnico do equipo celeste referiuse ao cómodo triunfo conseguido na primeira xornada ante o Castelló no primeiro desprazamento da tempada. "Quitámonos de encima a primeira xornada, na que sempre hai nervios. Agora hai que xogar no Pazo e leva emocións, así que haberá que xestionalas. Os xogadores teñen que empezar a coñecer ao público do Pazo... son varios detalles, pero estamos con moitas ganas e ilusión", comentou Epifanio, que se mostrou contento coa "posta en escena" do seu equipo ante o Tau Castelló.
