Paco Vázquez proclámase campión de k-1 55-59

LUGO. O piragüismo lucense sumou dúas medallas no campionato do mundo de maratón para veteranos celebrado na localidade portuguesa de Vila de Pardo. Paco Vázquez (Club Fluvial de Lugo) foi o gran nome da delegación de Lugo ao proclamarse campión mundial na categoría de k-1 masculino de 55-59 anos, mentres que Bernardo Sánchez (Fluvial do Barco) sumou un bronce no k-1 masculino de 45-49 anos.

Paco Vázquez demostrou que segue sumando títulos ao seu extenso palmarés. En Vila de Pardo, o piragüista lucense impuxo a súa fortaleza e o seu gran estado de forma para cruzar a meta en primeiro lugar, logo de percorrer os 19,5 quilómetros dos que constaba o percorrido en 1 hora, 32 minutos, 13 segundos e 19 centésimas. O de Lugo superou en 5 segundos e 36 centésimas ao noruegués Anders Andersen, quen finalizou segundo; e en 6 segundos e 56 centésimas á medalla de bronce, o portugués Óscar Chapulsky.

Paco Vázquez era un dos grandes favoritos para tocar metal en Portugal, un obxectivo que el mesmo se puxo antes de acudir onte á cita que tivo lugar en Vila de Pardo.

Pola súa banda, o outro medallista de Lugo, Bernardo Sánchez, realizou unha gran actuación na localidade lusa ao concluír nun meritorio terceiro lugar. Sánchez non puido optar ao título, xa que acabou a 57 segundos e 96 centésimas do gañador final, o surafricano Graeme Solomon cun crono de 1 horas, 47 minutos, 8 segundos e 58 centésimas. Solomon xogouse o ouro co español Rafael Carril, quen non puido dar unha última palada que o leva todo o máis alto do caixón e conformouse coa prata por tan só 43 centésimas.

O outro lucense que tomou parte onte no campionato do mundo de maratón foi David Armesto (Club Fluvial de Lugo), que concluíu na undécima posición a categoría k-1 para 40.44 anos, unha competición na que se fixo coa medalla de ouro o palisa surafricano David Mocke.