Unha seca que impide medrar: dous goles dos 'noves'

Secos na área rival, sen un caudal de goles necesario para que o xogo arraigue en vitorias, o Lugo espera que os seus dianteiros ofrezan unha mellora que solucione a súa traxectoria na Liga. Sen tantos a favor é difícil avanzar cara a posicións máis cómodas na táboa con velocidade. A tarefa de perforar a meta contraria parece estancada nos principais responsables desta parcela, as puntas, que só fixeron dúas tanta -obra de Dongou e Cristian Herrera- na Liga.

Só o Spórting presenta peores números en canto aos seus arietes, xa que aínda ningún nove logrou marcar nestas 13 xornadas de Liga. O Lugo é, xunto co Granada -cos dous goles de Adrián Ramos-, o seguinte equipo da categoría de prata con menos tantos dos seus dianteiros.

A cifra actual de goles marcados polas puntas branquivermellos é tamén a peor das sete campañas en Segunda desde o retorno en 2012. Tras os dous goles actuais, o peor dato de efectividade dos dianteiros data da pasada campaña e da 2014-2015, ambas con catro. O curso pasado Cristian Herrera lograra a estas alturas 2 goles por 1 de Mario Barco e de Francisco Fydriszewski. Na 2014-2015 Luís Fernández sumaba 3 goles por 1 de Aganzo.

As mellores cifras nos 13 primeiros partidos son as 9 dianas da 2013-2014 -cos 6 goles de Rennella e os 3 de Sandaza- e a 2016-2017, na que Joselu xa lograra 9 goles.

Na 2012-2013 e 2015-2016 foron 6 tantos anotados polas puntas. Na campaña do retorno Óscar Díaz fixera 5, mentres que Mauro Quiroga lograra 1 antes de lesionarse de gravidade. Na 2015-2016 Caballero logrou 4 tantos e Jonathan Pereira outros 2.

POUCOS REMATES. Pero xunto á cifra de goles, as puntas do Lugo tampouco se caracterizan por ser dos que máis rematan. O primeiro neste apartado é Cristian Herrera, con 17 tiros -o 28 da Liga igualado con outros 6 futbolistas-, dos que só 6 foron a porta. Escriche fixo 12, con só 2 entre os tres paus, mentres que Dongou logrou xutar 8 veces, das que 3 foron a portería. Jona é o peor dos catro, con só 5 remates e ningún entre paus.

En canto as veces que tocaron o balón na área, Cristian é o máis participativo, con 35 toques; séguelle Dongou con 16, Escriche con 15 e Jona, que só interveu dentro da área en 9 ocasións. Datos que deben mellorar para que o Lugo poida crecer en canto á súa cifra de goles e de puntos.