O centro do campo como o principio e o final, como creación e produto terminado, como ideario para exercer en Segunda División. A medular e a segunda liña como clave na loita por tres puntos no Alcoraz deste sábado (16.00 horas) entre dous equipos, o Lugo e o Huesca, que queren que esa zona do campo sexa a clave do seu xogo.
Mentres o conxunto aragonés parece lograr que o manexo da pelota sexa o sentido do seu fútbol, a chegada de Curro Torres ao mando do bando lucense busca emular a Míchel e que o seu equipo sexa protagonista.
Co preparador madrileño, o conxunto oscense é un dos que teñen unha maior porcentaxe de posesión ao seu favor. O Huesca é o equipo que dá máis pases bos (8.754), o segundo con máis pases totais (10.693) e o que máis remates realiza a porta (113). O Lugo é noveno en pases bos, con 6.915, décimo en pases totais (8.853) e duodécimo en remates a porta (84).
Mentres o xogo do Huesca pasa polo seu medular, non foi unha prioridade para o primeiro adestrador do club lucense este curso, Eloy Jiménez, quen prefería o xogo directo sobre un dianteiro aboia para evitar perdas en saída de balón.
A segunda liña do Lugo non destaca pola súa efectividade ao anotar só cinco goles en Liga
"Ante o Huesca será un partido difícil porque eles queren ter o balón. Creo que é o equipo que ten máis posesión de Segunda División. Sabemos que é un equipo que xoga ben", declara o defensa central do Lugo Mathieu Peybernes.
Outro aspecto a ter en conta no Huesca é a súa pegada desde a segunda liña. Os centrocampistas anotaron 16 dos 29 tantos a favor dos azulgrana no que vai de campaña. Incluso o máximo goleador dos de Michel é un dos seus mediocentros, o ex do Athlétic Míkel Rico, con cinco dianas. Ademais, o herculino Juan Carlos, suma catro, mentres Raba e Eugeni Valderrama anotaron tres.
No Lugo apenas contou a segunda liña como elemento goleador. Cos goles concentrados en Cristian Herrera e Manu Barreiro -cuxa cifra conxunta é de 13 dos 22 tantos do equipo-, desde o centro do campo anotaron apenas cinco tantos. Iriome, con dúas dianas, é o principal llegador, mentres Pita, Borja Domínguez e Álex López conseguiron un gol. Mellorar as súas cifras pode ser clave ante un candidato ao ascenso.
