Unha cita divertida e esixente onde mostrar que o adestramento acaba dando os seus froitos. Máis de trescentos corredores tomarán a saída do Estadio Gregorio Pérez Rivera o domingo (a partir das 11.30 horas) para participar na segunda edición da Carreira Popular Campus Terra Leyma —na que colabora o Grupo El Progreso—, unha competición de 7,4 quilómetros para a que aínda está aberto o prazo de inscrición.
Os que desexen correr unha das probas que gañaron adeptos estes dous anos poderán apuntarse ata as doce da noite deste mércores na páxina web www.carreirasgalegas.com.
Se o ano pasado foron 325 os atletas que pasaron unha gran xornada pola zona das Pedreiras, o Parque do Miño, o Pazo dos Deportes e o Campus de Lugo, a organización espera que este curso se poida superar a cifra para unha competición que busca ser unha referencia na cidade amurallada.
"Esta é unha carreira xa coñecida polos lucenses porque ocupou o sitio da proba das pistas e do Paseo do Miño do Corre con Nós. Para diferenciala un pouco o que fixemos foi manter esa primeira fase para que a carreira se estire e, despois, dar unha volta por todo o campus, visitando todas as facultades do campus", declarou Suso Castro, responsable de deportes do campus de Lugo.
"É unha carreira bastante técnica e que implica catro tipos de chan: a zahorra, o tartán da pista, a herba e o asfalto", engadiu Castro, que admitiu que "a proba é bastante técnica porque hai bastantes curvas, repeitos, subidas, baixadas, correr algo por herba, pola vaguada do Campus e por asfalto porque se irá polas rúas interiores da facultade de veterinaria e da escola politécnica. Penso que é unha carreira divertida".
A diferenza con respecto ao ano pasado foi a inclusión de categorías de nenos. Esta proba está enmarcada dentro dos Xogos Galaico-Durienses, nos que ademais das tres universidades galegas, participan a Universidade de Porto, a Universidade do Minho e a Universidade de Tras Os Montes e Alto Douro portuguesas, polo que haberá atletas lusos en Lugo este domingo.
