A deportista do Wild Wolf Fluvial de Lugo Susana Rodríguez conquistou a medalla de bronce no campionato de Europa de paratriatlón na categoría Tri 6 (deportistas con impedimentos visuais). A competición desenvolveuse onte na localidade turca de Alanya.
Susana Rodríguez e o seu guía (Mayalen Noriega) non tiveron sorte na proba de onte, pois unha picada no inicio da competición de bicicleta provocou que perdesen contacto co grupo de cabeza.
Logo de solucionar o contratempo, a triatleta galega reaccionou ata situarse á fronte da proba cando só restaba o sector a pé da mesma, pero acusou o esforzo e perdeu dous postos na liña de meta.
A vitoria conseguiuna a británica Melissa Reid (1.07.37 horas), mentres que a medalla de bronce foi para a tamén británica Charlotte Ellis (1.08.36). Susana Rodríguez, que é a vixente campioa do mundo da especialidade, entrou en meta cun tempo de 1.10.14.
