A atleta monfortina Saleta Fernández, que compite coa Valencia Atletismo, volveu á senda do triunfo tras proclamarse campioa da proba de salto de altura no campionato de España de federacións que se disputou o fin de semana en Cidade Real.
Saleta Fernández foise ata os 1,80 metros no seu mellor salto para darlle á selección galega a máxima puntuación na proba. Ademais, conseguiu superar ao seu gran rival, a valenciana Cristina Fernández, que non superou o listón en 1,76. Con esta vitoria sobre Cristina Fernández, Saleta Fernández sacouse un pouco a espiña do campionato nacional absoluto, no que se investiron os postos e foi a valenciana a que se impuxo.
O concurso da deportista monfortina foi impecable, alzándose coa vitoria sen cometer ningún fallo. Ao quedar xa como vencedora buscou o mellor rexistro da tempada para saltar sobre 1,86 metros, pero as malas condicións da pista e un vento molesto minguaron as posibilidades de conseguilo.
Outro atleta lucense que despuntou en Cidade Real, confirmando a súa progresión, foi o mozo Alexánder Barreiro (Lugo Running by Ramos Lourés), que no seu segundo ano consecutivo coa selección galega, conquistou a quinta praza no concurso de triplo salto. Realizou unha marca de 14.77 metros e quedou a menos de 20 centímetros da medalla de bronce no concurso.
Outro veterano nestes lidees, o vallista Miguel Pérez (Lucus Caixa Rural), conseguió posto de finalista ao terminar nunha meritoria sexta posición, onde asinaba un 14.67 segundos na proba dos 110 metros valas.
Para rematar, Marta Casanova (Adas O Barco) era novena na proba dos 5.000 metros lisos, onde finaliza cun tempo de 18.06 minutos.
