O piloto compostelán Jacobo Senín fíxose coa vitoria na oitava edición da Subida A Pontenova, na que foi unha das probas máis axustadas dos últimos tempos. Senín conseguiu alzarse co primeiro posto cunha vantaxe ínfima, de tan só dez milésimas, sobre Alexis Viéitez, o segundo clasificado na clasificación. Pablo Rei foi o terceiro na Pontenova e mantén o liderado no campionato galego de montaña.
Jacobo Senín logrou manter a distancia xusta con Viéitez a pesar de terminar tras el na cuarta e última manga. A vitoria do piloto de Santiago de Compostela foi posible grazas á constancia nos resultados durante os dous días, xa que nunca terminou fóra dos catro primeiros postos. Así, Senín (Barquea Norma M20 FC) obtivo unha marca acumulada de 4.13.673 minutos, mentres que Alexis Viéitez (Fórmula Dicode FR1) alcanzou un tempo de 4.13.683 minutos.
"A clave para levar a vitoria estivo en non precipitarnos, indo con calma e tratando de non cometer moitos erros", explicou Senín logo da última xornada na Pontenova. "Tómamonos a proba como un test máis de face a coñecer o coche e irnos adaptando a el pouco a pouco, xa que conducilo resulta difícil de primeiras", afirmou o compostelán, que a pesar do triunfo asegura que só pensa correr aquelas probas nas que se vaia sentir cómodo.
Alexís Viéitez, pola súa banda, asinou tamén un gran resultado, sendo segundo nas tres primeiras mangas e líder na final, aínda que o seu tempo non logrou ser o mellor por moi pouco. O piloto pontevedrés realizou un esforzo para chegar á proba, xa que sufriu un grave incendio que arrasou dous dos coches da súa escuadra e numeroso material.
O podio completouno Pablo Rei (Fórmula Outeda MK IV), que terminou cun tempo acumulado de 4.16.302 minutos e que lle permiten seguir liderando a clasificación xeral no campionato galego de montaña.
En canto aos pilotos lucenses, José Alonso Liste (Ginetta G50) conseguiu un meritorio sétimo posto na clasificación final e logrou unha moi boa actuación durante as catro mangas do fin de semana.
