A padeeira lucense Tania Fernández García logrou este domingo o terceiro posto no campionato do Mundo de maratón, celebrado na localidade portuguesa de Vila de Prado.
A lucense conseguiu completar o percorrido de 26.2 quilómetros, con sete voltas ao circuíto e seis porteos, nun tempo de 1.59.29.22, a menos de 30 segundos das subcampioas (Eva Barrios e Amaia Ousaba). O primeiro posto alcanzárono as húngaras Renáta Csay e Zsófia Czéllai-Vörös, quen finalizaron a proba en 1.56.14.05.
Tania Fernández García, que participou na modalidade k-2 xunto á súa compañeira Tania Álvarez, fixouse o obxectivo de clasificarse entre os cinco primeiros postos. "Estamos a falar dun campionato do Mundo, no que hai un nivel elevadísimo entre os participantes, polo que conseguir a medalla de bronce é algo moi importante para nós", apunta.
Nese sentido, a padeeira lucense sinala que un dos momentos de maior tensión foi "o sprint final, no que disputamos a medalla coas outras catro embarcacións que ían no noso mesmo grupo" no que foi, sen dúbida, o instante de maior emoción da proba.
Coa súa medalla de bronce deste domingo, no campionato do Mundo de maratón, Tania Fernández García, que actualmente milita no Club Kaiak Tudense - Axuda Paramos, puxo o punto e final a unha tempada infestada de bos resultados.
Non en balde, Tania Fernández gañou o campionato de España de maratón previamente -requisito para poder participar na competición deste domingo-, foi subcampioa no emblemático Descenso Internacional do Sela e tamén logrou catro medallas no campionato de España de esprint olímpico. Un segundo posto como integrante da selección nacional no XXI Trofeo Internacional k-4 Cidade de Valladolid e na LVI Regata Internacional de Sanabria completan o palmarés da lucense neste 2018, no que tamén figura cuarta no campionato de Europa de maratón, entre outros éxitos.
A representación española tivo unha actuación moi destacada nesa proba porque non só está o bronce conseguido por Tania Fernández e Tania Álvarez; senón que incluso Eva Barrios e Amaia Ousaba foron capaces de facerse coa medalla de prata. Coa única embarcación da potente Hungría moi destacada na cabeza de carreira, o castelán-leonesa Eva Barrios, que gañara a medalla de bronce en k-1, e a navarra Amaia Ousaba asestaron un golpe de autoridade á regata na sétima volta e última volta na que lograron irse do grupo de cinco unidades, e finalmente facerse coa segunda praza na competición.
