O adestrador do CD Lugo, Quique Setién, terá un ollo na enfermería do Ángel Carro durante toda a semana. As numerosas baixas por sanción e lesión obrigarán ao técnico cántabro a planificar o encontro ligueiro do sábado (18.00 horas) ante o Recreativo de Huelva con varias alternativas en función dos integrantes do persoal branquivermello cos que poida contar.
O duelo do pasado domingo ante o Huesca deixou dous novos nomes na cuneta. O herculino Carlos Pita e o arxentino Diego Tonetto non estarán ante o ‘Recre' por sanción. Ambos se unen a Seoane, que cumprirá o seu segundo partido de castigo pola vermella ante o Spórting, e Iván Pérez, ao que aínda lle restarán dúas semanas de recuperación da súa rotura fibrilar nos abdutores. Non terá fácil chegar ao sábado o mediapunta Rubén Durán, cuxa pubalxia o mantén no dique seco desde hai varias semanas e é improbable que poida estar en perfecto estado ao final da semana.
No apartado de dúbidas seguen Javi Rey e Pablo Álvarez, xunto con futbolistas como Fran Pérez ou Guayre, que non se adestraron onte co grupo e foron tratados polo fisioterapeuta do Lugo das súas molestias musculares.
