O encontro disputado no Martínez Otero entre o Foz e o Pontenova, correspondente á liga de Segunda Autonómica, estivo marcado e deslucido por unha agresión dun xogador local a un visitante nos últimos compases do encontro. Un novo futbolista do equipo branquivermello, de só 16 anos, golpeou cunha puñada no pómulo esquerdo a un rival, de 33 anos, cando un xogador do Foz dispúñase a sacar un córner a favor e o resultado reflectía un 1-0 a favor do conxunto local, o mesmo resultado co que concluíu o enfrontamento.
O xogador pontenovés caeu ao chan, conmocionado, e o árbitro decretou a expulsión do xogador focense, reflectindo na acta a agresión. Pese ao golpe, o futbolista do cadro visitante repúxose e foi capaz de acabar o encontro e non foi ata o día seguinte cando se levantou e comprobou os danos do golpe.
