O pavillón de Vista Alegre prepárase xa para ser o escenario do derbi lucense de Primeira División de fútbol sala que medirá o sábado, desde as 18.30 horas, ao Burela Pescados Rubén co Azkar Lugo. Un e outro conxunto chegan nun excelente momento. Os resultados da anterior xornada foron todo un golpe de efecto positivo para os seus obxectivos e formulacións da tempada.
O Azkar Lugo e o Burela Pescados Rubén viviron un venres máxico e coñeceron en plenitude o que é gañar os partidos practicamente no último segundo. Os pupilos de Diego Ríos levaron os tres puntos fronte a un rival directo como o Peñíscola, ao que adiantan na clasificación. Agora, con 16 puntos, teñen máis que encarrilada a permanencia na máxima categoría do fútbol sala nacional e sumar cunha nova vitoria no derbi permitiríalles soñar e pensar que non está dita a última palabra para terminar entre os oito primeiros da clasificación, algo inesperado a principio da tempada. O tanto de Antonio Diz no último segundo ante Gus posibilita que o Azkar Lugo chegue pletórico ao partido e sen descartar agora mesmo nada logo de conseguir a súa mellor clasificación no que vai de tempada.
Edu, a mellor parada da xornada
O regreso de Edu ao quinteto inicial do Burela FS non puido resultar máis positivo, xa que a meta callou un espectacular encontro para axudar ao seu equipo a sumar a vitoria. De feito, a liga Nacional de Fútbol sala decidiu que unha das súas intervencións, unha dobre parada ao pivote do Pozo Álex, fose elixida como a mellor da xornada, por diante de Paco Sedano, do Barça.
