A Liga Galega de Orientación 2020 abrirase o día 8 de febreiro en Lugo coa décimo oitava edición do trofeo El Progreso Concello de Lugo, que este ano recupera o seu percorrido orixinal polas inmediacións do Monte Segade. Dependendo das categorías, variarán entre os 2.000 e os 6.000 metros, aínda que os responsables da sección de orientación do Fluvial non fan fincapé nos quilómetros senón noutras cualidades claves neste deporte como a lectura e interpretación correcta dos mapas, cuxas escalas variarán entre o 1:10000 e o 1:7500. Sinalan xa que logo que se trata dunha carreira de media distancia na que prima a técnica sobre o esforzo físico.
Teranse que valer de todo iso os máis de 500 participantes que se espera tomen parte na proba que servirá de arranque á liga Galega, que esta tempada inclúe nove competicións por toda a xeografía galega. Precisamente, para o trofeo do 8 de febreiro, espérase a asistencia de deportistas de toda Galicia, pero tamén doutras comunidades e incluso de Portugal.
Todo iso púxose de manifesto este mércores, na presentación deste trofeo que cumpre xa a súa maioría de idade, coa asistencia de patrocinadores, empresas colaboradoras e directivos do propio Club Fluvial de Lugo.
O Trofeo OPIE El Progreso Concello de Lugo comezará ás 9.30 e espérase que finalice ás 13.30 horas. A zona de concentración estará situada nas instalacións do Fluvial e haberá presaída nas inmediacións do club.
Tras a proba realizarase a entrega de premios para os tres primeiros clasificados das categorías elite masculina e feminina; e medallas para as categorías inferiores. Unha vez realizada a entrega de premios realizarase o sorteo de agasallos entre os participantes que non pertenzan ao club organizador.
O prazo de inscrición, a realizar na web www.fegado.es, estará aberto ata o vindeiro domingo, día 2 de febreiro.
