O XXXII Tríatlon do Miño disputouse na mañá deste domingo coas vitorias de Iván Puentes Barcia, do Tríatlon Ferrol, cun tempo de 1.00.40 horas, na proba masculina e de Natalia Hidalgo Martínez, do club Cidade de Lugo Fluvial, cun tempo de 1.10.11, na feminina.
A proba constou de 750 metros de natación, 19,5 quilómetros de ciclismo e 5 quilómetros de carreira a pé ata a liña de meta. Os participantes saíron en grupos de cinco corredores, cada 30 segundos, a contrarreloxo. Foi un percorrido moi competido e sen incidencias, con máxima esixencia para os deportistas debido á falta de referencias. A maior esixencia da climatoloxía foi para a proba feminina, que se disputou ás 12.00 horas, co sol no alto, mentres que a masculina deu comezo ás 10.00.
Na categoría masculina, detrás de Iván Pontes Barcia quedaron Alejandro Rodríguez, tamén do Tríatlon Ferrol, con 1.01.17, e Martín Cando, do Cidade de Lugo Fluvial, cunha marca de 1.02.17, quedando á súa vez segundo na sub-23 masculina. No sexto e sétimo lugar acabaron David González, terceiro na categoría junior (1.03.19), e Esteban Basanta, cun tempo de 1.03.35, ambos do Cidade de Lugo Fluvial.
Na proba feminina, tras Natalia Hidalgo -que á súa vez foi gañadora igualmente na categoría de sub-23- estiveron Anaís Rivas, do Tríatlon Rías Baixas, cunha marca de 1.12.00, e Érika Pérez, do AD Náutico de Narón, cun tempo de 1.13.00. Sétima e oitava foron Elena Conde, segunda ademais na categoría sub-23, con 1.17.05, e Andrea Igrexas (1.17.49), ambas as atletas do AD Tri-Penta Terras de Lugo.
En canto á clasificación por equipos, na categoría masculina o vencedor foi o Tríatlon Ferrol, con dous atletas no podio masculino, seguido polo Cidade de Lugo Fluvial, cun competidor no podio, e tres entre os dez primeiros. Terceiro terminou o Tríatlon Arteixo, con dous efectivos entre os dez primeiros clasificados.
Na feminina, quedou na cabeza o Tríatlon Inforhouse Santiago, cunha atleta entre as cinco primeiras clasificadas, seguido do AD Náutico de Narón, cunha participante no podio, e do Tríatlon Arteixo, tamén cunha atleta entre as cinco primeiras, sendo ademais o único equipo en acabar entre os tres primeiros nas dúas categorías, co terceiro posto tanto na categoría feminina como na masculina.
