O Corgo respira patinaxe. Desde hai uns meses, un grupo de nenas adéstrase no pavillón municipal do Corgo baixo a denominación de Club Maxia de patinaxe artística sobre rodas.
A presidenta, Rosa García Rodríguez, fundou no ano 1994 o club Maxia da Coruña e agora puxo en marcha, desde este verán, un novo proxecto nesta localidade lucense. "O club formouse este verán. Fixemos os estatutos no mes de xuño porque tiñamos xente de Lugo patinando na Coruña. Así, cando se fixo un grupo de dez nenas consideramos que valía a pena que se desprazasen un ou dous adestradores e tamén que servise para promocionar o deporte. O de facelo no Corgo xurdiu porque unha nena é de alí e o seu pai coñecía e buscou a instalación", explica Rosa García.
A presidenta do club, que é coruñesa pero que se despraza habitualmente a Lugo, conta tamén a situación actual do club. "Agora hai trece nenas, dous adestradores e un delegado. Os dous adestradores e o delegado desprázanse desde A Coruña ata Lugo, Imos un día á semana para ver se nun futuro pódense facelo dous días á semana", di.
"Adéstranse un día á semana –os mércores– dúas horas –de 18.00 a 20.00 horas– e prepáraselles para os exames de niveis. O día 23 de decembro de 16 a 20.00 horas, faremos unha xornada de portas abertas, e logo tamén unha exhibición para que os que queiran vexan como é o funcionamento do club e se se anima máis xente. Hai nenas de seis a catorce anos, pero a franxa é moito máis ampla. Incluso se se anima xente maior faríase un grupo de adultos. As categorías son desde benxamín a sénior e coas bases de competición da federación galega", sinala.
Rosa García comenta tamén cando comezarán a competir as patinadoras do Corgo e como. "En xaneiro presentarémolas a competicións. Ao estar a empezar, farán a base da patinaxe, que se chaman niveis, e funciona como os cintos en judo", explica García, que á vez aclara que o club do Corgo "é filial a nivel deportivo do Club Maxia da Coruña, pero non a nivel burocrático e administrativo".
A presidenta do Club Maxia de patinaxe artística sobre rodas recordou tamén como empezou neste mundo do deporte.
"Empecei cando tiña dez anos, decidín facer o club en 1994 e agora contamos con patinadores que destacaron ou destacan a nivel nacional e internacional. Unai Cereijo é agora mesmo campión de España e de Europa e ten 12 anos. Lucas Yáñez é tamén campión de España. Os dous son deportistas de alto nivel. Fácil non é nada e todo é a base de traballar. Nós saímos adiante con moita ilusión e así se fundou o club na Coruña e agora buscamo o mesmo no Corgo", finaliza Rosa García.
