Gran balance da delegación lucense no campionato de Galicia absoluto de atletismo, disputado durante todo o fin de semana na Coruña e onde os locais lograron un total de 25 medallas, mostrando así o bo estado de saúde do atletismo provincial. Os atletas lucenses conseguiron seis títulos autonómicos, mentres que levaron nove medallas de prata e dez de bronce.
Destacou o bo momento de forma de Adiaratou Igrexas (Lucus Caixa Rural), que se impuña con solvencia na final dos 200 metros lisos, onde a subcampioa do mundo marcaba un tempo de 25.25 segundos.
O seu compañeiro de equipo Miguel Pérez facía o propio nos 110 metros valas, cun tempo final de 14.80 segundos. Pola súa banda, o tamén integrante do Lucus Esteban Igrexa dominaba a proba dos 5.000 metros lisos cun tempo de 15.14 minutos, mentres que o seu tamén compañeiro de equipo Iago Núñez non daba opción a carreira dos 400 metros valas, onde gañaba cun crono de 56.02 segundos.
A monfortina María Cedrón (A Gándara) lograba gañar na carreira dos 800 metros lisos cun tempo de 2.19 minutos e Álex Barreiro (Lugo Runnnig By Ramos Lourés) era o dominador no triplo salto cun rexistro de 17.79 metros.
MEDALLAS DE PRATA. Santiago Rozas (Lucus Caixa Rural) lograba dúas medallas de prata nos 110 metros valas e 400 metros valas. Pola súa banda, Lucía Sánchez do Val (Escola Atlética Lucense) tamén se facía con dous subcampeonatos, o salto de lonxitude e o salto de altura. A súa compañeira de equipo Carmen González tamén conseguía a medalla de prata na carreira dos 800 metros lisos.
Miguel Silva, tamén da Escola Atlética Lucense, conseguía idéntico metal no salto de altura, mentres que a novísima Olesandra Kostenko subíase ao segundo escalafón do podio nos 5.000 metros marcha. Bilal Dahomouni tamén era segundo nos 3.000 metros obstáculos e Manuel Furtado (SG Pontevedra) alzábase coa mesma posición nos 5.000 metros lisos.
Para rematar, Ainara Rodríguez (Escola Atlética Lucense) alzábase coa medalla de bronce nos 800 metros lisos, do mesmo xeito que facía Nerea Lage (Atletismo Friol) nos 1.500 metros. Paula Piñón (Atletismo Feminino Celta) conseguía dúas medallas de bronce, ao subir ao terceiro escalafón do podio en disco e xavelina, mentres que Carlos López (A Gándara) era tamén terceiro nos 800 metros.
María Carballido (Atletismo Friol) conseguía a medalla de bronce na carreira dos 400 metros lisos, mentres que Enma Pérez (Franciscanos) facía o propio no salto de altura. Pablo Modia (Lucus Caixa Rural) finalizaba en idéntica posición en lonxitude e Antón Martínez (Escola Atlética Lucense) conseguía a última medalla para os lucenses na carreira dos 5.000 metros lisos.
Tamén destacou na cidade herculina a focense Rosalía Rodríguez-Gigirey, da Ría de Foz. Logrou dúas medallas de ouro no Galego sub-23, en 400 e 800 metros, e unha de prata, en 400 valos.
