Tempo para a Copa Galicia

A Copa Galicia centrará a última fase da pretemporada do Leite Río Breogán. A vinte días do inicio da LEB Ouro (sábado 28 en Castelló, ás 20.30 horas), as dúas próximas semanas a preparación do equipo completarase con tres encontros correspondentes á competición galega, da que o Breogán é o vixente campión.

O primeiro partido xogarao o conxunto que dirixe Diego Epifanio o vindeiro domingo 15, ás 17.30 horas no Palacio Municipal dos Deportes de Lugo ante o Ourense. O vencedor deste encontro xogará o venres 20 de setembro ás 20.30 horas, no Pavillón A Raña de Marín, contra o Marín Peixe Galego —o pasado sábado impúxose ao Básquet Coruña (69-63)— para discernir quen disputará a final da Copa Galicia, o domingo 22 de setembro ás 12.30 horas ante o Obradoiro, que pola súa condición de equipo da liga Endesa non tivo que xogar partidos de clasificación. O día 20 de setembro e no mesmo escenario ás 18.00 horas enfrontaranse os dous equipos que non poden aspirar a disputar a final, é dicir, o Básquet Coruña e o perdedor do Breogán e Ourense.

No encontro ante o Ourense producirase o debut coa camiseta celeste do dominicano Dago Peña. Logo de participar no Mundial de China coa selección da República Dominicana ten prevista a súa chegada a Lugo para a noite de este martes polo que podería incorporarse de inmediato á disciplina do seu novo club.

Pola súa banda, o escolta finlandés Roope Ahonen terá que esperar para enfundarse por primeira vez a camiseta breoganista. O xogador aínda non puido xogar ningún partido no que vai de pretemporada por mor dunha distensión muscular no recto do cuadríceps da perna dereita. A recuperación, segundo fontes do club, marcha segundo o previsto e, de feito, o xogador xa empezou a facer carreira e sesións de tiro. Se non xorde ningún inconveniente, e se o Breogán logra a clasificación, podería xogar a final da Copa Galicia.