O Leche Río Breogán está nestes momentos fóra dos play off na LEB Ouro. Catro derrotas en oito partidos sitúanos na zona media da clasificación, igualado con outros seis equipos que ocupan desde a sétima á duodécima posición. Nin os seguidores máis pesimistas do club lucense podería esperar un inicio semellante dun equipo que aspira ao ascenso de categoría.
Tanto o posto na táboa como os resultados negativos poderían quedar nunha mera anécdota —sen ir máis lonxe o San Pablo de Burgos que ascendeu con Diego Epifianio na tempada 2016-17 levaba na oitava xornada a mesma bagaxe que o Breogán— se realmente se puidese esperar unha reacción dos breoganistas. Pero tanto as circunstancias —as lesións non axudan— como imaxe que está a ofrecer o equipo non fai máis que acrecentar as dúbidas sobre as posibilidades do persoal. Unha desconfianza crecente entre os afeccionados e que co paso das xornadas parece ir afectando cada vez a máis membros do persoal. O Breogán é nestes momentos un mar de dúbidas.
E para este diagnóstico só existe un remedio: gañar e convencer. Polo tanto, cada partido é agora unha dobre batalla para os de Diego Epifanio; unha, interna contra os seus propios medos, e outra, ante o rival de quenda, que agora mesmo ve no conxunto lucense unha grande oportunidade para conseguir un triunfo de prestixio.
Agora mesmo non hai partido fácil nin intranscendente para o Breogán. E desde logo o que disputará o sábado (20.00 horas) na pista do Huesca ten eses condicionantes.
A diferenza do Leche Río Breogán, o equipo que máis puntos encaixa, o Huesca é dos que menos reciben na LEB Ouro
O Breogán ten que gañar e enfronte terá un rival que exhibe a mesma bagaxe, catro vitorias e catro derrotas, pero cunha particularidade, xa que dentro da irregularidade que o Huesca está a mostrar no seu xogo —capaces de perder na cancha do Canoe ou de vencer con folgura ao Melilla—, na súa cancha estanse mostrando bastante sólidos. De feito, tres das súas vitorias, ante Granada, Marín e Melilla, foron logradas ante o seu público.
A diferenza do Leche Río Breogán, o equipo que máis puntos encaixa, o Huesca é dos que menos reciben na LEB Ouro. E no traballo defensivo é desde onde parte gran parte das opcións de triunfo do conxunto que dirixe Guillermo Arenas.
Un equipo novo, só continúan Dani García e Diego de Blas da tempada pasada, e moi novo. O Huesca conta con catro xogadores cedidos: o base Dani García, polo Manresa; o escolta Álex Tamayo e o á-pivote Andriy Grystak, ambos do Estudantes, e o aleiro Ander Urdiain, que pertence ao Zaragoza. A partir de aí conta con catro xogadores que xa coñecen a liga: Fran Cárdenas, Robertas Grabauskas, Nedim Dedovic e Vasilije Vucetic, e dous xogadores que viven a súa primeira experiencia profesional, como o estadounidense Olin Carter e o á-pivote croata Davis Skara.
Os máximos anotadores do equipo oscense son os pivotes Vucetic (13 puntos de media) e Skara (12 puntos por partido) mentres que desde o perímetro é o estadounidense Olin Carter (10,7 puntos) o que achega máis anotación, sendo ademais o xogador máis certeiro no lanzamento de tres puntos, con 16 triplos de 37 intentos (43%). Vucetic e Skara son tamén os mellores reboteadores.
