O bo momento que vive o baloncesto feminino na cidade de Lugo tradúcese na proxección de moitos dos adestradores e preparadores que integran os diferentes equipos da cidade. Un destes casos é o de Miguel López, que ata hai poucos días desempeñaba o labor dayudante de Carlos Canteiro no Durán Maquinaria Ensino e que agora emprende unha nova aventura en solitario en Dinamarca.
O adestrador lucense asinou co Horsholm 79ers danés, onde compaxinará o traballo de primeiro adestrador do equipo feminino co de axudante do coruñés Diego Fernández, que levará as rendas do equipo masculino.
Miguel López afronta con ilusión esta nova aventura no país nórdico. "é unha oportunidade que me xurdiu a semana pasada e tiven 48 horas para tomar unha decisión. Tal e como está a situación é España, con tanta intriga nos clubs e o baloncesto escolar... custoume bastante decidirme pero creo que é unha boa oportunidade", indica Miguel López.
"Estiven sempre moi ligado aos irmáns Engroba, tratáronme como un fillo. Este último ano no Ensino fixen un master á beira de Carlos Canteiro", comenta un Miguel López que ve esta aventura como un gran paso na súa carreira. O único que lle atafega é "o frío e o idioma".
