A ACB volve estar a tiro para o Río Breogán. Concretamente a só corenta minutos de xogo ou o que é o mesmo, a un só partido. O que disputará esta tarde (19.00 horas no Palacio dos Deportes de Granada) ante o Covirán. O terceiro e definitivo partido da serie final da LEB Ouro. O que gañe ascende. Non vai máis.
Ata o momento, os dous finalistas fixeron valer o factor cancha. No primeiro encontro da serie os andaluces impuxéronse por (67-53) e no segundo a vitoria foi para os galegos (81-78). Pero nin isto nin o inquietante dato de que o Río Breogán perdeu nos cinco últimos desprazamentos pode servir este domingo de referencia.
É a final das finais. Non é un partido calquera. A tensión e a presión acusásena a partes iguais e haberá un condicionante físico que pode ter un importante papel no desenvolvemento do encontro. Parece evidente que o Granada chega máis castigado que o conxunto breoganista. Con menos rotacións que o seu rival, e máis tras as lesións de Pardina e de Edu Gatell, e cunha acumulación importante de minutos, e de responsabilidade no xogo, da tripleta que forman Thomas Bropleh, Lluis Costa e Alex Murphy, o peso da tempada, e sobre todo das tres esixentes eliminatorias de play off están a pasar factura.
No segundo dos encontros, o xogado en Lugo, púidose apreciar os evidentes problemas físicos de Bropleh, ao que as molestias que arrastra desde a eliminatoria ante o Coruña uníuselle unha dor abdominal. Tamén se apreciou limitacións neste aspecto a Bamba Fall que se queixou en varias ocasións do ombreiro dereito. De todos os xeitos, ambos xogarán este domingo. "Thomas Bropleh tivo algunhas cambras. Agora atópase mellor e descansando, traballando cos fisios e en condicións de xogar. Teñen ganas de dar ese último paso apara os demais", comentou este sábado o técnico granadino Pablo Pin en declaracións recollidas por Granada Dixital.
Pablo Pin acusou os xogadores do Río Breogán de tensionar o partido en Lugo
O Breogán, polo tanto, debe intentar aproveitar a súa superioridade física como primeiro argumento. Se Granada intentará imprimir o seu ritmo, buscar o maior número posible de puntos en transición, os breoganistas buscarán un encontro con moita esixencia defensiva.
Outra faceta que pode resultar clave é o rebote. Os de Diego Epifanio mostraron ao longo da tempada a fortaleza e consistencia do seu xogo interior ante case todos os equipos. Pero o rebote pode ser desequilibrante. No último partido, a diferenza en rexeites foi de 18 favorables ao conxunto lucense que ademais capturou 19 rebotes baixo o aro do Granada. Isto en se mesmo sería determinante, sobre todo se os de Diego Epifanio logran limitar as perdas, unha auténtica sangría para os breoganistas nos dous encontros disputados da final.
Pero as sensacións, a presión, terán este domingo un peso fundamental. Pablo Pin, desde logo, non quere desaproveitar o factor cancha. O técnico acusou os xogadores do Breogán de tensionar o partido de Lugo : "Tiven que ver o vídeo para saber o que pasara. é algo innecesario, é unha cousa que buscaron para levantar o ambiente e á afección. Hai unha vez que eles veñen ata o noso banco e a segunda é unha antideportiva que lle pitan a Germán e Salva Arco vai empuxar logo a Germán. Quixeron que a presión fose maior, pero creo que non foron accións necesarias", dixo Pablo Pin.
