O DERBI PROVINCIAL entre o Ribadeo e a Sarriana que se xogou no Pepe Barreira acabou en táboas, cos dous goles marcados nos instantes finais do encontro. Un partido onde dominou máis o líder, tivo máis ocasións, pero onde o Ribadeo tamén tivo as súas opcións á contra.
Na primeira parte o balón foi do cadro de Edu Rodríguez, pero o mal estado do terreo de xogo do Pepe Barreira non facilitaba progresar en circulación. á contra, o Ribadeo tivo dúas claras ocasións de gol nas botas de Diego Núñez e Santi, pero o conxunto visitante tamén as tivo moi claras, como un traveseiro de Gerardo, outro pau do dianteiro asturiano e un man a man de Diego Rei que non soubo concretar.
Na segunda parte seguiu a mesma liña de partido, coa Sarriana dominando e o Ribadeo buscando as contras e xerando perigo. No minuto 89 chegou o tanto de Iván para o Ribadeo, que saíra cinco minutos antes, e que mandou o balón ás redes tras un saque de esquina. A continuación, noutro saque de esquina lanzado por Gerardo rematou ao segundo pau Omar de cabeza libre de marca. Antes dos dous goles, Gerardo tivo un remate de cabeza ao pau -o terceiro na súa conta- e tivo unha ocasión nun balón aéreo onde saíu o porteiro local, Dos Santos, e onde os visitantes pediron penalti.
SANTABALLÉS-AS PONTES (1-1). O Santaballés non puido pasar do empate a un tanto no encontro que se disputou na Liga. O conxunto que adestra Juan Rodríguez foi mellor que o As Pontes na primeira parte. A mellor oportunidade que houbo nos primeiros 45 minutos foi para os locais, cando Pelao lanzou o balón alto cando estaba só diante da portería.
O Santaballés xogou moi ordenado atrás e buscando as contras. Nunha incursión do propio Pelao na área o árbitro sinalou penalti e desde os once metros marcou o mesmo protagonista. Pouco antes de chegar ao descanso, foi Iván Pérez o que puxo o empate no marcador grazas a un cabezado tras unha falta lateral.
Na segunda parte igualáronse as forzas, pero apenas houbo ocasións claras de gol. Si que houbo chegadas por parte dos dous equipos, pero ningunha que chegase a materializarse en gol. E iso a pesar que o As Pontes quedou cun home menos no minuto 56 pola expulsión de Iván Pérez.
RESIDENCIA LEMOS (1-1). A Residencia e o Lemos repartíronse os puntos nun partido onde os visitantes comezaron moi forte, sacando sete córneres nos primeiros 25 minutos. Colgaron moitos balóns á área e inquietaron a portería local, pero sen chegar a marcar. Se tivo unha moi clara Veloso para a Residencia, que se plantou só diante de Losada e este fixo unha gran parada. Tamén un defensa sacoulle un balón franco a Chiqui cando ía rematar. Pero se adiantou o Lemos cun gol de Mauro de disparo cruzado.
Na segunda parte, o Lemos tivo a ocasión para pór o 0-2, cun tiro de Mauro ao que respondeu Diego cunha gran parada. A partir do minuto 70, con varios cambios, os locais foron superiores e puideron marcar nas botas de Chiqui e de Veloso. O gol do empate chegou nunha xogaba combinativa que finalizou López dentro da área pequena. Nos últimos instantes o Lemos reclamou un penalti e a Residencia tivo unha última oportunidade nas botas de Veloso pero o seu disparo foise fose.
