O soño de José López Rivas esfumouse onte, O piloto lucense non cumprirá o obxectivo de acabar o Dakar 2012. Onte viuse obrigado a abandonar logo dos problemas sufridos na primeira xornada.
O piloto do equipo Rácing Dakart Marineda City, o único galego no Dakar, acabou a primeira etapa sen tracción 4x4, o que en palabras do propio Rivas pódese cualificar como «un auténtico milagre».
O lucense chegou ao parque pechado ás 23.00 e os mecánicos puideron revisar o coche, pero logo de horas déronse conta de que non había unha solución inmediata para saír na segunda etapa, xa que co coche nesas condicións sería imposible superar as especiais da xornada.
«Abandono sen ter a posibilidade de demostrar a miña capacidade de loita. Sinto unha amarga decepción por este abandono, que espero convértase pronto nunha desas leccións que quedan gravadas a lume no máis profundo da alma, e sirva para nun futuro facer as cousas mellor e poder cumprir o meu soño de completar un Dakar», indicou López Rivas.
O español Marc Coma (KTM) adxudicouse en motos a segunda etapa do Dakar, entre as localidades arxentinas de Santa Rosa e San Rafael, e situouse líder na clasificación xeral. O piloto catalán accede á primeira posición do xeneral e abre unha pequena brecha de 2:30 de vantaxe sobre Chaleco López e 2.52 sobre Despres, que marcha terceiro.
A especial de coches terminou coa vitoria da o Attiyah, mentres que Peterhansel ponse líder. Nani Roma foi cuarto e é quinto a 5.32 de Peterhansel.
Dous mortos
Dous espectadores morreron onte mentres intentaban seguir a segunda etapa do Dakar, ao verse precipitada a súa avioneta á terra na localidade de Ourense, pertencente ao departamento de Tres Arroios.
