Trinta segundos. Un tempo nimio, insignificante, mísero nunha tempada. Incluso imperceptible nunha semana de traballo. Con todo, o pasado venres no derbi galego fronte ao Lobelle foron unha eternidade para o Azkar. Se o destino reservase un mellor final para ese medio minuto no que os composteláns lle deron a volta ao marcador, os lucenses gozarían de tres puntos máis na táboa nun momento clave para evitar o descenso.
A pesar do mazazo que supón perder un choque de máxima rivalidade no suspiro final, Rubén Rodríguez Reigosa, 'Xuxa', cre que o persoal azul xa o superou e pensa no seu próximo rival, o Talavera, con quen xogará este venres (20.45 horas). «O persoal está un pouco tocada porque xogamos un gran partido. En trinta segundos perdemos o encontro, pero xa non podemos pensar niso, a nosa cabeza está no Talavera», afirmou Xuxa.
