O campionato de España de rallyes de asfalto decidirase na última proba, en novembro en Madrid, nun duelo sen concesións entre o alacantino Miguel Fuster e o lucense Sergio Vallejo. Éste foi a orde en que quedaron os dous no Rallye de Cantabria, disputado este sábado, e que non serviu para que o campionato tivese dono.
Fuster, ao volante do seu Ford Fiesta R5, impúxose cunha vantaxe de 1.20 minutos respecto ao lucense, que pilota un Porsche 997GT30, pero en Madrid, o 22 e o 23 de novembro, só valeralle repetir esa primeira posición para proclamarse campión de 2014. De imporse entón, sería a súa cuarta vitoria consecutiva.
En Cantabria, Vallejo pasou apuros para manter as súas opcións. Mentres Fuster xa se colocou de líder no primeiro tramo, o de Meira non puido acceder ao segundo posto ata o sexto tramo. Beneficiouse do abandono do piloto local Surhayén Pernía, que marchaba segundo. Dos oito tramos do rallye, Vallejo gañou un e Fuster, os demais.
Quen si viu despexado o camiño foi o copiloto de Sergio Vallejo, o seu irmán Diego, que con esta segunda posición proclamouse campión de copilotos.