Como un solteiro no centro da pista, á procura dunha parella de baile coa que compartir o futuro inmediato. Fernando Seoane segue instalado nunha especie de First dates nun inicio de Liga na que aínda non atopou ao seu compañeiro ideal. Mentres os dúos parecen consolidarse noutras zonas do campo, a medular mantén a un só home como fixo.
A pretemporada deixara a Borja Domínguez como a parella do de Ames. Os dous compartiran espazo a pretemporada, onde formaran xuntos tanto cando partiron de inicio como cando o fixeron na segunda metade. Con todo, a situación cambiou co comezo da competición oficial.
O futbolista de Ames é o único que foi aliñado de inicio polo técnico Juanfran García no centro do campo nos tres partidos disputados ata o momento na liga. Ao seu lado exerceron Borja Domínguez en Fuenlabrada, Iriome e o "Puma" Rodríguez ante o Leganés. Na segunda parte do encontro ante os pepineros foi Juanpe o que exerceu á beira de Seoane nun dobre pivote. O propio mediocentro andaluz debutou como titular contra o Almería, aínda que foi substituído ao descanso. Nesa segunda metade fronte aos almerienses foi Xavi Torres a nova volta de porca para formar un novo dúo no círculo central branquivermello, sempre con Seoane como común denominador.
OUTRA VIMBIA, CERCA. O segundo capitán na sala de máquinas do Lugo terá pronto un novo compañeiro co que formar parella. A semana pasada o club branquivermello achegaba posturas co Valladolid por Moctar El Hacen, obxecto de desexo dos despachos branquivermellos desde o final da pasada Liga.
Espérase que nos próximos días a negociación poida chegar, por fin, a bo porto. Por se a situación torcésese, nas últimas datas saíu un novo nome para reforzar o posto de mediocentro: Ramón Azeez. Segundo indicou en días pasados o xornalista Iván Quirós, o nixeriano do Granada e ex do Lugo é unha das alternativas ao Fan.
O que parece claro é que, o próximo 5 de outubro, Fernando Seoane terá un novo compañeiro co que compartir un posto no que só el parece contar coa confianza plena de Juanfran García.
