A Sarriana goleou á Residencia (4-1) nun derbi sen historia. O equipo de Dani Fernández saíu cun ritmo moi alto e marcoulle catro goles ao seu rival en 25 minutos excepcionais. Javi Fraga abriu a conta aos dous minutos e Omar aumentouna aos sete. Un tanto en propia meta de Dani López e de novo Javi Fraga sentenciaron o choque.
Os locais levantaron o pé do acelerador na segunda metade, na que Raposín logrou o tanto de honra para o Residencia.
O Viveiro encabeza a táboa de Preferente tras sumar a súa segunda vitoria noutras tantas xornadas, na que marcou seis goles e mantivo a portería a cero. Os vivarienses lograron un sufrido triunfo por 1-0 ante o Boiro, nun choque entre dous rivais chamados a loitar polo ascenso a Terceira.
Arturo protagonizou a primeira ocasión de perigo para o Viveiro, tras un roubo de balón que lle permitiu plantarse ante o porteiro, pero decidiu mal e realizou un remate demasiado centrado cando tiña só a strong <>Gerardo ao seu lado libre de marca.
Kuman tratou de sorprender cunha vaselina a Manu Cedrón, que reaccionou ben. A meta vivariense converteuse no protagonista do choque con dúas paradas antolóxicas. Na primeira delas evitou un gol cantado tras un remate de Paco ao bordo da área pequena, á saída da área. Tras un disparo de falta directa de Xaime, que rozou o traveseiro, chegou a segunda gran intervención da meta vivariense. Changui rematou dentro da área e o esférico chegoulle a Kuman, que obrigou a lucirse a Cedrón. O rexeite foi a Paco, pero Uriol evitou o gol tirándose ao chan para rexeitar o balón. Do 0-1 pasouse ao 1-0, xa que o Viveiro saíu á contra e Gerardo internouse na área para bater a Berto cun remate que tocou na cepa do poste.
A segunda metade caracterizouse pola ausencia de ocasións, as continuas faltas e as interrupcións. O Boiro baixou a intensidade do seu xogo, aínda que o seu adestrador tratou de reactivar o equipo con cambios moi madrugadores. Ningún dos dous contendentes creou perigo, sobre todo tras a expulsión de Paco. Os coruñeses buscaron as costas da defensa local con balóns longos, pero Manu Cedrón saíu ao corte con acerto.
A segunda das seis citas consecutivas previstas do Ribadeo a domicilio, debido ás obras no Pepe Barreira, tivo un adverso e postremeiro desenlace contra o Arteixo (1-0). Os visitantes encaixaron un gol a falta de catro minutos á saída dun córner.
O máis xusto sería a igualada ao tratarse dun partido de contadas oportunidades. As tres únicas ocasións do primeiro tempo corresponderon aos visitantes. Isaac despexou un pase da morte de Erni. O córner consecuente, botado por Santi, cabeceouno Mario mansamente ás mans do porteiro Rumbo. A mellor ocasión ribadense foi un croque desviado do propio Mario a centro de Aitor no 31.
O local Ray non alcanzou a conectar un centro de Nano no minuto 70. Rubén Porto xerou o único tanto ao executar un córner moi pechado, a media altura e axudado polo vento. Santi meteu a cabeza no corazón da área para aloxar o esférico dentro da portería dun Ribadeo mal situado.
O Foz sorprendeu ao Noia cun temperán gol de Asier, aos cinco minutos de xogo. A escuadra de Gayol aguantou despois o asedio local.
Información feita en colaboración con Miguel Albo e a ADG.
