O Club Fluvial homenaxeará a Mariano Castiñeira coa San Silvestre máis particular e solidaria das realizadas ata o momento. A pandemia do covid-19 modificou esta tradicional proba que se disputa cada 31 de decembro ata o punto de que este ano non será presencial nin terá carácter competitivo.
Non haberá carreira como tal na tarde do último día do ano. Con todo, si hai a posibilidade de poder comprar a camiseta e o dorsal —terá un custo de sete euros por unidade e haberá que facelo de forma presencial nas propias instalacións do Fluvial— para aqueles que desexen facelo. A recadación pola venda das camisetas e dorsais doarase integramente a Cruz Vermella de Lugo.
"Disputar a San Silvestre, por moitas precaucións que tomásemos, podería ter certos riscos para a saúde dos participantes. Por iso decidimos apostar polo formato non presencial no que a recadación da venda das camisetas se doase a unha causa solidaria", declarou o presidente do Club Fluvial, Perico Valledor, no acto de presentación, ao que acudiron o presidente provincial de Cruz Vermella, Luis Abelleira; o director de institucións de Galicia Norte de Caixabank, Vicente Centelles; e a viúva de Mariano Castiñeira, Luisa Cabezas.
"O escenario actual condicionou a organización dunha carreira que xa é un clásico na última tarde do ano en Lugo. Non queriamos interromper a súa celebración, pero ao mesmo tempo pensamos en ser responsables", dixo Valledor
Esta edición especial da San Silvestre servirá ademais para render tributo a un dos principais mentores do atletismo lucense, Mariano Castiñeira.
Nese sentido, Valledor expuxo que "a perda de Mariano foi moi dura para todo o atletismo lucense. El foi un dos grandes mentores deste deporte na nosa cidade e a nosa provincia. Sen o seu labor non serían posibles moitos dos éxitos alcanzados polos grandes atletas de Lugo, como Tito Margaride, Alessandra Aguilar ou Adrián Ben. Con esta homenaxe queremos, ademais de agradecerlle todo o que fixo polo deporte, poñer en valor a súa grandeza como persoa máis aló do aspecto profesional", subliñou o presidente do Fluvial.
