A Run Foz Run pechou este mércores a súa inscrición con case 500 apuntados entre a carreira absoluta, as de menores e a Andaina. A proba terá lugar este domingo, a partir das 10 horas, aínda que os senderistas realizarán o seu percorrido o día antes pola tarde.
A proba está incluída no Tour Mariña, circuíto promovido por Championchip e O Progreso, sendo a cuarta da tempada, pero tamén está incluída no circuíto Duacode Run Foz Run 2022. Organizan Run Foz Run e o club local Ría de Foz, que conta coa colaboración do Concello de Foz, entre outros organismos, e da Acia CCA Foz.
Na presentación da proba estiveron o alcalde, Francisco Cajoto, ademais de Manuel Eiras, do Club Atletismo Ría de Foz e Paleo e Fanego, da Acia-CCA Foz.
Ademais dos premios individuais para os mellores de cada categoría, unha das grandes novidades que ofrece a Run Foz Run respecto doutras probas é que realiza varias competicións por equipos.
Desde a organización agradecen o apoio das institucións e casas comerciais e confían en que o domingo se poida ver un gran espectáculo no que gocen a lume de biqueira tanto os nenos como os maiores.