Logo de sufrir unha grave lesión de xeonllo, Roope Ahonen volvía xogar o pasado 5 de febreiro, algo máis dun ano despois do contratempo sufrido na cancha do Oviedo. Aínda que logo da súa reaparición volveu parar algo máis dunha semana por mor dun golpe nun xemelgo, as súas aparicións no Río Breogán xa son regulares e a súa recuperación evidente. "O meu nivel de ritmo é cada vez mellor e cada partido sinto máis cómodo co equipo. Sempre intento dar o mellor de min e espero estar ao mellor nivel e poder axudar ao equipo, en especial nos play off. Tanto os meus compañeiros como eu estamos a traballar duro para iso", di o escolta finlandés.
O xogador aproba a tempada do seu equipo e, ademais, está convencido de que é o rival a bater na loita polo ascenso: "estou moi contento de como xogou o equipo en xeral". "Houbo períodos nos que quizais poderiamos xogar mellor, pero en ocasións necesitas estes malos momentos para corrixir erros e volver xogar ao mellor nivel. Somos o mellor equipo da liga e somos os líderes. Polo tanto, hai que estar contentos. De todos os xeitos, sempre se pode mellorar para ser un equipo aínda máis forte nos play off", engade.
Se se lle pregunta polas causas polas que o nivel de xogo do Breogán descendeu na segunda fase, Ahonen asegura que "é complicado de explicar". "Pero os outros equipos tamén melloraron e xogamos ante os mellores da liga. é normal ter momentos difíciles ao longo dunha tempada. E cando pasa isto, o noso traballo céntrase en volver ao noso mellor nivel", sinala.
Un das facetas no que o rendemento breoganista sufriu un claro retroceso foi en defensa. O Breogán encaixou dez puntos máis de media na segunda fase con respecto á primeira. Esa circunstancia non preocupa "en absoluto" ao escolta breoganista. "Non estou nada preocupado por isto. Temos un gran equipo e sabemos o que temos que mellorar para xogar a un nivel máis alto e gañar partidos. Cando estamos centrados en defensa e xogamos o un para o outro, somos un equipo realmente difícil de superar", explica.
Na pasada xornada o conxunto de Lugo conseguiu un amplo triunfo ante a Palma (97-66), tras realizar ademais un bo duelo. "Vainos a axudar a recuperar a nosa mellor versión. Foi un partido que nos deu moita confianza e mostrounos como hai que seguir xogando para estar ao noso mellor nivel", di Roope Ahonen.
O Río Breogán, a falta de dúas xornadas, defende o liderado no grupo de ascenso, posición que Ahonen valora polo que significa de face a afrontar as eliminatorias de ascenso. "é importante ter a vantaxe de xogar en casa nos play off porque isto seranos de gran axuda. Xa vimos no partido ante a Palma canta enerxía obtemos do apoio da afección", comenta.
O primeiro paso para manter a privilexiada posición que agora ocupa o seu equipo será lograr gañar o vindeiro domingo (12.30 horas) na cancha do HLA Alicante. "Este encontro será unha moi boa proba para nós. é un partido importante que temos que gañar", di Ahonen.
Do conxunto alacantino sinala que "é moi bo equipo e está a xogar ben a pesar das lesións dalgúns xogadores. Son intensos en defensa e xeran moito desde o pick and roll".
