Quique Fraga: "Debemos pedir perdón á afección"

O adestrador do Breogán, Quique Fraga, quixo pedir perdón á afección lucense tras a derrota por 99-63 que significou a eliminación do equipo dos play offs de ascenso á ACB.

"Non houbo partido, gañáronnos desde o principio ata o final. Gañáronnos ben e nós non fomos capaces de xogar a nada. Tivemos erros que pensamos que corrixiramos e que se volveron mostrar. O único que me queda é pedir perdón por este partido á afección de Lugo. Os xogadores dérono todo", manifestou Fraga.

"A afección do Breogán é o malo de todo isto. Sempre fallamos e é a afección que máis se merece ter unha alegría. Espero que o ano que vén e que consigan o que todos merecemos en Lugo que é ser de ACB", opinou.

Sobre se o desenlace da serie era o esperado, o preparador de Lugo indicou que: "evidentemente non esperaba este final para a serie. Tal e como foi a eliminatoria esperaba que fose moito máis. Non houbo competición, o Coruña estivo impresionante, vimos que o seu físico foi moi superior ao noso e fixemos un malgaste tremendo para poder chegar ata aquí".

O aspecto físico foi unha das claves da serie para Fraga, que afirmou que o Breogán chegou desgastado ao quinto partido. "Fisicamente pasáronnos por enriba. Eran moito máis altos e moito máis físicos. Nunca puidemos con eles neste partido. Foi imposible", valorou. "Se somos moito máis baixos e para loitar un rebote temos que loitar os cinco a matar iso desgasta moito. Tivemos un desgaste brutal toda a serie e non chegamos ben a este partido", engadiu.

Quique Fraga rexeitou achacar a derrota á actuación arbitral. "Gañáronnos moi ben, gañáronnos perfectamente. Non podo falar dos árbitros nin de coña", apuntou.

Sobre Rakocevic dixo que: "o tema de Rakocevic é moi fácil. Jeff (Xavier) estivo mal das costas desde o primeiro partido e tivo que xogar. No último en Lugo tiña que gañalo si ou si e considerei que Rakocevic non tiña que xogar e neste último considerei que si. ¿Se foi un revulsivo? Non xogamos ben ningún e el podía xogar ben".

Doutra banda, o escolta estadounidiense Jeff Xavier indicou que quere seguir en Lugo un ano máis. "Grazas Lugo. Síntoo moito por este ano, pero farei todo o posible para xogar aquí o próximo ano", dixo en Twitter.