"Que os xogadores crean que o que están a facer é o camiño único que hai, que non é momento de mirar atrás senón todo o contrario para potenciar cousas boas, para minimizar erros. Nós sempre imos intentar que o sistema, o modelo de xogo e o once vaian en función das características do contrario. A día de hoxe non o sei aínda e non quero dar pistas ao rival. Nós temos claro o noso camiño", asegurou Juanfran en rolda de prensa telemática.
Sobre a súa aínda curta estancia ao mando do Lugo, o técnico destacou a implicación do equipo e amosou a súa sorpresa ante a unión e a humildade do grupo de futbolistas que comanda. "Atopeime un grupo humano que facía moitísimos anos que non me atopaba e eles teñen que darlle valor ao que teñen dentro", comentou.
Tamén insistiu na dificultade do rival, ao que encomiou pola súa capacidade de variar de estilo durante os partidos e pola calidade dos seus xogadores. "En liñas xerais, o maior perigo do Alcorcón é o bloque, un bloque moi compacto, xogadores que individualmente son importantes, que defensivamente andan ben e no medio campo están con confianza. Teñen dúas bandas moi rápidas con moi bo un contra un, bo golpeo de balón e, logo, arriba tanto Sandaza como Rui Costa son xogadores moi diferentes. En función de se xoga un ou outro o equipo actúa de distinta forma", indicou o técnico.
As estatísticas colocan ao Alcorcón como un conxunto vulnerable no seu estadio, aínda que Juanfran García non se confía e admite que é máis importante realizar un bo xogo e deixar de lado as estatísticas.
"Nós non nos guiamos por estatísticas, somos máis de guiarnos polo que vemos, independentemente de que xoguemos en casa ou fóra. Hoxe en día, co tema do coronavirus, case é mellor xogar a domicilio", indicou o preparador.
O técnico valenciano ten ante si outro partido crave para os intereses futuros do conxunto lucense. Os branquivermellos intentarán manter as boas sensacións mostradas ante o Numancia en busca de tres puntos que serían moi importantes para lograr a ansiada salvación.
Esta gran dinámica a domicilio vese embazada polos malos resultados no seu propio feudo, onde logrou reter 19 puntos, o segundo peor equipo da categoría despois do Rácing de Santander, colista da táboa e que só conseguiu 15 puntos como anfitrión.
O conxunto dirixido por Fran Fernández conta, ademais, co cuarto máximo goleador da categoría, o gaditano Juan Diego Molina, Stoichkov, que suma esta tempada 16 goles, unicamente superado por Stuani (Xirona), Luís Suárez (Zaragoza) e Yuri (Ponferradina).
Manuel Morais ata 2021
A primeira decisión de Jorge Rodríguez de Cózar ao mando da área deportiva do Lugo foi renovar por un ano do dianteiro da Polvoreira Manuel Morais.
O venezolano, de 22 anos, amplía así o seu vínculo coa entidade lucense ata o final da próxima tempada. Morais xa debutou co primeiro equipo nun encontro de Copa do Rei.