"O Lugo foi o club que máis se empeñou en min, e iso é algo moi importante cando un xogador busca unha saída". Así explicou Frederico Venancio, a última fichaxe do Club Deportivo Lugo, os seus motivos para incorporarse ao novo persoal branquivermello, que dirixe Juanfran, esta tempada. O central portugués chega cedido do Vitoria de Guimaraes, da máxima categoría portuguesa, un club co que tivo a fortuna de disputar a liga Europa na pasada tempada e desde o que saíu cedido á Championship inglesa –ao Sheffield Wednesday– no curso 2017-2018. "Tiña ganas de probar o fútbol español logo doutras experiencias e por iso optei por vir a Lugo, para abrir mercado en España e axudar ao equipo tanto individual como colectivamente", indicou Venancio este xoves.
O novo central branquivermello recoñece que se incorpora á disciplina do club sen apenas adestramentos nas súas pernas, pero coa máxima ilusión de entrar no equipo canto antes. "Non fixen pretemporada normal en Portugal, adestrei a parte cun grupo de xogadores que estaban na mesma situación que eu, e obviamente non teño o ritmo dos meus compañeiros, pero farei o máximo posible para recuperar o tempo perdido", prometeu o portugués.
As súas características como defensor coinciden co que tanto ansiaba o adestrador valenciano durante o período estival. Forte no xogo aéreo, con capacidade para saír o balón xogado e adaptable a varias posicións e alturas defensivas, Venancio chega ao Ángel Carro disposto a facerse cun posto de titular que pelexará cos ata agora habituais para Juanfran, Marcelo Djaló e Diego Alende, aos que, por certo, xa coñece. "Os meus compañeiros foron moi educados e cariñosos e co míster falei un pouco, pero teremos moito tempo para charlar", asegurou. A barreira do idioma de momento é un problema, pero o portugués apuntou que pronto lle porá remedio. "O meu obxectivo é aprender español canto antes para coñecer mellor aos meus compañeiros e entender o que me pide o adestrador".
Do mesmo xeito que Chris Ramos, o luso tivo a oportunidade de seguir os partidos do Lugo esta tempada e recoñeceu que queda coa actuación contra o Leganés. "Gañamos 2-1 pero sobre todo vin un equipo solidario, unido, e ao futbolista sempre lle gusta estar en equipos así", concluíu.
