A deportista do ximnasio lucense AB Fitness Conchi Fernández estará presente este fin de semana no OCR World Championships, unha proba de obstáculos soamente apta para deportistas de alto nivel que este ano se celebra en Londres.
Conchi Fernández, de 19 anos, competirá mañá na carreira de 15 quilómetros 100 obstáculos na modalidade individual elite feminina. O domingo disputará a disciplina de substitucións xunto á actuais campioa e subcampioa de España.
A deportista fincada en Lugo vivirá en Londres o seu primeiro Mundial, un reto asombroso para unha atleta que leva traballando e adestrándose desde fai menos dun ano para competir en probas deste tipo.
Un dos artífices do éxito de Conchi Fernández é o seu adestrador, Óscar Ramos Castro, que tamén competirá nesta espectacular proba e apoiará á súa pupila para intentar que consiga o seu obxectivo.
A preparación dunha proba destas características implica moito tempo e sacrificio. Exercicios propios do crossfit, porteos, carreira, traballo de forza, e adestramentos extremos en condicións adversas, son parte da preparación que leva a cabo a atleta galega xunto ao seu adestrador.
Óscar Ramos destaca o potencial de Conchi Fernández, á que considera "un portento físico". O adestrador viuna un día nun dos seus ximnasios e chamoulle a atención a súa capacidade física e a súa soltura á hora de afrontar os exercicios, polo que a convenceu de que era unha deportista idónea para competir neste tipo de probas.
"Vina adestrarse pola súa conta nun dos ximnasios, adestrábase moi mal pero denotaba ser un portento físico. Empeceille a ensinar a técnica, logo de dous meses xa era unha deportista incrible", declara Óscar Ramos.
Conchi Fernández afronta o seu primeiro Mundial sen marcarse ningunha meta particular, simplemente gozar e intentar facelo o mellor posible. "A verdade é que expectativas non teño ningunha, nunca fun a Londres e nunca fun a un mundial. Estou un pouco en shock, irei gozar, seguro, desta experiencia incrible", indicou a deportista galega.
Saltos imposibles, barro, pasarelas de alambrado de espino, cargas de peso e unha infinidade de obstáculos aderezados con choiva e frío intenso conformarán parte do reto para unha deportista que se supera día a día.
