A sarriá arrolou ao Negreira a domicilio e mantense colíder co As Pontes e o Noia. Os tres equipos suman catro vitorias noutros tantos partidos. Ségueos o Ribadeo, que gañou en Boimorto. A xornada, caracterizada polo elevado número de goles marcados por catro dos cinco equipos lucenses, trouxo os primeiros triunfos do Foz e do Viveiro. O Castro sucumbiu por 5-4 en Santa Comba e aínda non coñece o triunfo.
O Foz impúxose ao Estudantil por 4-3. O equipo de Jesús Gayol mostrouse superior, pero encaixou un gol de penalti e dous de falta directa que lle permitiron ao seu rival meterse no partido. Os branquivermellos situáronse cun 2-0 a favor aos 20 minutos, con goles de Ibán Gayol, de penalti, e Xenxo. Falcón reduciu distancias para o Estudantil, pero Asier fixo o 3-1 antes do descanso. Aos tres minutos da segunda parte, Falcón conseguiu o 3-2 de penalti. O 4-2 de Xenxo parecía sentenciar o choque, pero Falcón pechou o seu hat trick e levou a incerteza á bancada.
A ritmo de cruceiro, a recentemente ascendida Sarriá logrou o seu cuarto triunfo ao grande no campo do Negreira, con tres goles nos once primeiros minutos. A partir de aí, o conxunto branco dedicouse a conservar o botín e dominar os tempos. A Sarriá, guiada de xeito providencial polo técnico Alberto López, realizou unha magnífica posta en escena: orde e agresividade na presión e ideas moi claras co balón. Omar abriu a lata cun remate cruzado desde o punto de penalti. Un minuto máis tarde, nun calco da xogada do 0-1, Quiroguita fixo o segundo con outro remate cruzado desde dentro da área. Cos locais á deriva, Diego Núñez cabeceou á rede no primeiro pau e deixou case sentenciado o encontro no minjuto 11.
O Negreira tirou de orgullo, pero non logrou aproximarse en exceso á área de Javi. Tras o paso polos vestiarios, Mauro, Omar e Álvaro tiveron oportunidades para conseguir o cuarto gol visitante.
BOIMORTO-RIBADEO. Luki e Poratti asinaron en Boimorto os tantos da vitoria do Ribadeo (1-2). O equipo celeste, co debut do recentemente fichado Viusky para paliar as baixas de Hugo e Javi, continúa a dous puntos do tridente de cabeza. Foi xusta e incluso corta a vitoria visitante. Só con balóns colgados inquietaron algo os locais, que xogaron o último cuarto de hora con dez xogadores.
Os tres tantos foron marcados antes do intermedio. Un pase en profundidade de Poratti deixou só a Luki, que resolveu con facilidade ante Cortés para facer o 1-0. O Boimorto replicou cun disparo de Andrés desde o frontal que tocou nun defensa e coouse na portería de Viusky, fichado en principio para un mes. O Ribadeo desfixo a igualada tras unha falta lateral de Santi que aproveitou Poratti, anticipándose ao porteiro.
Na segunda parte, Criss errou un man a man e Poratti, libre de marca, enviou moi alto un pase atrás de Luki. Este xogador desperdiciou outra nova opción ao disparar fóra dentro da área pequena.
Cambiou o Viveiro a dinámica de perder pola mínima para gañar na súa visita ao Ordes (2-3). O equipo celeste, co debut de Poceiro na actual tempada, mostrouse máis sólido que nas anteriores xornadas. O encontro pareceu romper aos 15 minutos con dúas dianas do Viveiro. Primeiro, o rebote dunha falta executada por Xaime deu sen querer a Lucas, que mandou o esférico ao interior da súa portería. Pouco despois, un centro raso de Vicente empuxouno Mariño sobre a mesma liña de gol.
O Ordes errou un penalti, por mans de Álex Meitín. Entre a luva de Kiko e a madeira neutralizaron o lanzamento de David Suárez. O propio Suárez recortou distancias de cabeza antes do descanso.
Un centro de Agus desde o costado dereito cabeceouno Vicente á dereita do porteiro para facer o 1-3 ao comezo da segunda parte. Os locais apertaron nos dez últimos minutos. Tras as ocasións de Víctor Hervés e Roi, outro croque de David Suárez, a asistencia de Iván, colocou o 2-3 definitivo en Vista Alegre.
Iván González, exxogador do Lugo, converteuse nun auténtico pesadelo para o Castro ao marcar catro tantos, o último cando expiraba o partido, para dar o triunfo ao Xallas, cos visitantes en inferioridade numérica por expulsión de Javi Fraga. Nunha verdadeira tolemia de partido, o Castro chegou vivo aos últimos compases de xogo, tras igualar un 4-2 en contra. Os 20 primeiros vinte minutos foron unha delicia para o espectador: seis goles, un festival de graves erros defensivos e a confirmación dos problemas defensivos do Castro.
Tras unha primeira metade accidentada, o Castro mellorou as súas prestacións na segunda parte. Buide asinou o 4-3 nunha acción individual. Dumi igualou a contenda por primeira vez nun balón solto tras un saque de esquina. Co rival en inferioridade numérica, o Xallas fíxose cos tres puntos ao marcar Iván a centro de Madiop.
Información feita en colaboración con J. Á. Díaz e a ADG.
