O Pescados Rubén gaña o premio á regularidade

A regularidade ten premio, e por partida dobre. Os Pescados Rubén Burela FSF aproveitou de marabilla o empate do Ponte Ourense, o seu perseguidor, para deixar case blindada a cuarta praza da clasificación da Primeira División feminina, logo de superar con suficiencia ao Leganés, 5-2. Con este resultado, o conxunto mariñán está xa matematicamente clasificado para disputar a Copa de España, a falta aínda de 5 xornadas para a conclusión do campionato.

As xogadoras do Burela FSF Pescados Rubén non deixaron escapar a oportunidade de brindarlle un triunfo ás dúas compañeiras que regresaban por motivos ben diferentes. A dedicatoria dos tres puntos ante o Leganés, 5-2, foi para a porteira Ana Romeu, que regresou logo dunha experiencia laboral e académica. Tamén para Emma, xa recuperada dunha lesión de xeonllo que a apartou un ano das pistas.

Non foi o mellor partido do cadro laranxa pese ao triunfo. Só a calidade individual de xogadoras como Jozi, que incluso marcou un gol desde a súa propia portería, Dany, autora de dous tantos, ou Judith, cada vez con máis galóns no equipo a pesar da súa mocidade, permitiu á escuadra de Xullo e Lucas solucionar o partido ante un correúdo Leganés, que lle puxo as cousas moi complicadas.

O arranque laranxa foi prometedor, cun carrusel de chegadas que comezou cun disparo ao pau de Dany e continuou con dous remates de Cilene, o segundo cunha boa intervención de Marta Valbuena. O Leganés intentou estirarse e Puche e Ángela tiveron as primeiras opcións, aínda que foi Cilene a que aproveitou unha deixada de Dany para sorprender á porteira visitante, cun forte disparo de lonxe.

O corpo técnico burelense sorprendeu aos últimos 5 minutos coa aposta de porteira-xogadora para ter o control do xogo, aínda que Cilene tivo que intervir para frear un lanzamento de Patri, de vaselina, e Jozi tamén detivo un man a man contra Ángela. Tras o susto do tramo final da primeira metade, o Burela FSF pareceu máis enchufado no tramo inicial da segunda, cunha boa transición ofensiva de Cilene e Shio que Lara enviou á rede.

Lonxe de vir abaixo, o Leganés volveu meter medo aos locais cun tanto de Ángela tras un erro defensivo local. Puche e a propia Ángela perdoaron o empate, e do posible 2-2 pasouse ao 3-1, cun pase de Dany que Shio rematou no segundo pau, xa outra vez con alternativas de porteira-xogadora e ataque de catro.

A falta de 6 minutos, tamén o Leganés puxo en práctica o xogo de 5, pero Jozi marcou desde o seu campo para eliminar calquera indicio de reacción madrileña. Os afeccionados que se deron cita na Vista Alegre aínda tiveron a oportunidade de gozar de dous goles máis, con Dany, que asinou o seu dobrete e Puche, que maquillou o marcador a falta de poucos segundos para o final.