O Polvorín volve ver como o covid suspende un dos seus partidos. A filial do Lugo ía desprazarse este domingo ao terreo do Fisterra para medirse co conxunto da Costa da Morte, pero un positivo por coronavirus no persoal do conxunto coruñés obrigou á suspensión do encontro, tal e como informou o equipo local ao programa Galicia en Goles.
O partido ante o Fisterra era importante para os xogadores branquivermellos, que encaixaron un duro correctivo na visita ao Vilalbés (5-1) no partido aprazado disputado o pasado mércores. Os branquivermellos sufriron na Magdalena a súa peor derrota da tempada e a visita ao campo do Fisterra supuña a primeira oportunidade de redención para o cadro de Álex Ortiz, que pretende sumar tres puntos ante un rival ao que xa gañou hai algúns días, 2-0 na Cheda, nun partido tamén aprazado da xornada inicial.
Con todo, a filial do Lugo terá que esperar polo menos unha semana máis para volver saltar aos terreos de xogo logo da suspensión do encontro que se ía celebrar no campo Ara Solís a partir das 16.30 horas.
O seguinte compromiso da Polvorín será, curiosamente, o derbi ante o Vilalbés o próximo fin de semana na Cheda nun duelo correspondente á xornada 13 da liga.
Deste xeito, a filial branquivermella terá a posibilidade de resarcirse do 5-1 do mércores ante o mesmo rival dez días despois.
