Pita non estará contra o Córdoba por unha pequena rotura muscular no sóleo

O CD Lugo visitará o domingo ao Córdoba sen o seu capitán, Carlos Pita, ao que lle diagnosticaron unha lesión no sóleo.

O club explica no parte médico que as probas de diagnóstico por imaxe ás que foi sometido o xogador coruñés confirmaron unha pequena rotura muscular no sóleo.

O centrocampista, que se perdeu o partido ante o Alcorcón por acumulación de amarelas, xa non puido participar no encontro do pasado fin de semana co Atlético Osasuna.

O xogador traballa fóra de grupo, pendente de evolución, e non estará ante o Córdoba nun partido crave na loita pola permanencia.

Pita é o máximo goleador do Lugo con sete tantos na tempada na que máis goles marcou no fútbol profesional.

SOANE SEGUE DE BAIXA. O seu habitual compañeiro no centro do campo do equipo branquivermello, Fernando Seoane, tamén está de baixa por unha lesión de xeonllo, quen, segundo explica o club, continúa co seu proceso de recuperación de forma satisfactoria e comezou a alternar o traballo de fisioterapia e o de readaptación.

A lista de baixas complétana o uruguaio Hernán Menosse, que prosegue co seu proceso de readaptación dunha lesión muscular fóra de grupo, pendente de evolución, e Antonio Campillo, que se repón dunhas molestias no xeonllo esquerdo.